Dos gardenias, El manisero, Guantanamera e Quizás foron algúns dos temas que se puideron escoitar este sábado no espectáculo Cando saín de Cuba, que puxo en escena no Teatro Principal de Pontevedra o grupo Os de Algures. A montaxe, promovida polo Concello, deulle continuidade á peza De Pontevedra á Habana, que se puidera ver o ano pasado no mesmo escenario.
Preto de 90 persoas de dez agrupacións locais diferentes participaron nestes espectáculo que recrea unha viaxe entre Cuba e Nova York (Estados Unidos) a través do teatro, a danza, a música e a escenografía. Dividida en catro actos, a montaxe está protagonizada por doce músicos da asociación de gaiteiros Os de Algures; trinta intérpretes do Coro Vinderel do IES Xunqueira I de Pontevedra; os músicos da orquestra cubana Rompiendo la Rutina; bailaríns da asociación de danza e teatro Cafuné; bailaríns da escola de danza Pontebaile; actores e actrices dos grupos de teatro Argallada e Tarabelo; e figurantes dos grupos Cafuné, Galidanza e Tremoioas de Algures.
Segundo informou o Concello, a produción contou tamén con dez persoas no equipo técnico, de iluminación, audiovisuais, atrezzo e montaxe escenográfica.
"Con este espectáculo pretendemos homenaxear a figura dos homes e das mulleres que fixeron as súas vidas na emigración e deixaron a súa pegada nas artes escénicas, musicais e líricas", explicaban os responsables do espectáculo en palabras facilitadas polo Concello. "Faise tamén un recoñecemento a Eduardo Pondal e Pascual Veiga, a Curros Enríquez, José Castro e Xosé Fontenla Leal, como promotores e creadores do himno que hoxe nos representa a todos".
