UN FEIXE de criaturas das profundidades do mar tomaron este martes as rúas de Pontevedra nun espectáculo de luz e son. Cabaliños do demo ao son de tambores, medusas iluminadas con luces brancas, zancudos chegados do interior dos océanos e peixes coas formas máis extrañas deslumbraron aos pontevedreses que se achegaron a ver os primeiros espectáculos do festival Itineranta, que se celebra estes días na cidade.
O número protagonizado pola compañía francesa Remue Menage inauguran o festival de espectáculos na cidade, chamado Abysses, foi só un dos tres shows que acolleron as rúas de Pontevedra durante a tardiña do martes. Os franceses fixeron unha parada en Pontevedra para amosar un universo máxico no que combinan a música, o baile e as artes circenses como os malabares ou os zancos.
Deste xeito, na xornada do martes amosaron tamén os seus espectáculos os artistas de Asaco Producciones, de Mérida. A compañía ofreceu Tanque Gurugú, un número cheo de cor no que a interacción co público foi fundamental. Neste sentido, o espectáculo centrouse no público infantil e sacou a pasear polas rúas un tanque cheo de cor que repartía amor alí por onde pasaba. Así, os dous protagonistas do espectáculo eran un pallaso yogui que repetía mantras tibetanos e un tenente preocupado por que ninguén atravesase as fronteiras delimitadas polas barreiras de seguridade que recordaba ao Gran Ditador de Charles Chaplin. Así, no número infantil houbo oco tamén para a sátira. O espectáculo rematou cunha gran festa tras a eliminación das fronteiras e a creación dun espazo onde se impuxo o amor e a liberdade.
Por outra parte, a compañía Yera Teatro, de Granada, trouxo ata Pontevedra a un grupo de personaxes a bordo dun antigo zeppelin que intentaron amosar as habilidades que aprenderon nas súas viaxes arredor do planeta. No espectáculo, chamado Nómadas, mesturábanse disciplinas como a danza, as acrobacias ou os malabares.
A compañía volverá actuar este mércores co seu pasarrúas umen. Así, un grupo de figuras xigantes con forma humana iluminarán a cidade coas súas siluetas de luces de cores a partir das 21.45 horas desde a Praza de España ata Curros Enríquez, pasando pola Praza da Peregrina. Ademais, tamén na xornada do mércores, amosarán o seu espectáculo Scura Splats, un grupo de Castellón que recreará unha selva nas rúas da cidade (ás 20.00 horas dende a Praza de España).
Por outra parte, Troula, de Vigo, amosará o seu número Psycodelia a partir das 20.30 horas dende a Praza do Teucro. A xornada deste mércores tamén contará coa presenza de Discípulos de Morales, de Badalona, que imitarán ao personaxe de novela Frankenstein co seu espectáculo Pakostein. A partir das 21.15 horas dende a Praza de Méndez Núñez.
A FESTA. Ao longo dos tres días de festival, que rematará o xoves cun espectáculo de lume na Praza da Ferraría, representaranse once números orixinais de nove compañías de toda a Península —e mesmo do estranxeiro nunha programación preparada por Troula, que tamén participará amosando o seu show. Así, na xornada deste xoves volverá haber pasarrúas a cargo de Inventi Teatro, Forani Teatre, Bambolea e Scura Splats. Os artistas desta última compañía, chegada dende Castellón, serán os encargados da traca final, con lume e pirotecnia na Ferraría.
O obxectivo é ofrecer ao público espectáculos interactivos nos que a participación da xente da rúa é un piar básico. Esta é a novena edición dun festival xa consolidado que funciona como preámbulo ás Festas da Peregrina.