viernes. 27.11.2020 |
El tiempo
viernes. 27.11.2020
El tiempo

María Victoria Moreno xa ten unha placa no edificio no que residiu en Pontevedra

Descubrimento dunha placa na memoria de María Victoria Moreno. RAFA FARIÑA
Descubrimento dunha placa na memoria de María Victoria Moreno. RAFA FARIÑA

O número 15 da avenida de Vigo acolleu un sinxelo acto ao que acudiron familiares seus

O Concello de Pontevedra volveu homenaxear este martes a María Victoria Moreno. Foi a través da instalación dunha placa no edificio no que residiu, situado no número 15 da avenida de Vigo. "Nesta casa viviu María Victoria Moreno". Esa é a mensaxe que se le xa na que fora a súa vivenda.

Ao acto acudiron o seu viúvo, a súa filla e a súa neta. Tamén varios concelleiros pontevedreses, do goberno e da oposición, e o presidente da Real Academia da Lingua, Víctor Freixanes.

A homenaxe produciuse días despois de que se inaugurara a avenida que leva o nome da escritora, homenexeada este ano no Día das Letras Galegas, no barrio de Campolongo. 

Ao descubrimento da placa non puido asistir o alcalde pontevedrés, Miguel Anxo Fernández Lores, e a edila de Cultura, Carmen Fouces, adicoulle unhas verbas no seu nome:

D71K9126
Se hai unha protagonista absoluta neste ano en Pontevedra, ela é María Victoria Moreno. E non só por dedicarlle a nosa gran festa literaria, senón sobre todo por ter a oportunidade, ampliada pola enorme visibilidade que lle dá a Real Academia Galega, de situala no lugar que debe ocupar dentro da cultura galega. 
 
Moreno é todo un exemplo de integración na nosa vida colectiva, de compromiso, de ecoloxía cultural. Un chegar e identificarse coas substancias máis doces do noso país: a súa lingua e a súa literatura. 
 
Un exemplo de entrega ás letras galegas dunha estremeña de nacemento que vén demostrar a tantos fillos desleigados de Galiza que a nosa lingua é valiosa non xa para seguir o normal desenvolvemento xeracional, senón tamén para ser adoptada por persoas que, nacendo castelán falantes normalízanse en galego sen drama ningún. 
 
A súa produción literaria propia, as súas traducións, a súa docencia, o seu labor cultural, son chanzos dunha vida entregada á supervivencia cultural de Galiza a través dun labor abnegado e teimudo: ensinar, prender a luz aínda nun escenario de tebras como o último terzo do franquismo, remar a prol do desenvolvemento humano e cultural das xentes da súa cidade, do seu contorno. 
 
Mª Victoria foi, ademais, unha namorada de Pontevedra e das súas xentes. As nosas rúas, prazas e parques polas que paseaba a diario, soa ou acompañada dos seus cans, as longas conversas coas amizades na libraría Seijas... Se hoxe estivese entre nós, de seguro que se atoparía leda de termos recuperado entre todas e todos, de facérmola segura e habitable. Cumprimos, como ela escribiu,  “a tarefa  de facer as nosas rúas gratos lugares de leria, de paseos e de encontros, de lecer e convivencia”. 
 
Grazas a MVM, que proseguiu o intenso labor de Bóveda e Castelao, e de moitos outros referentes da Galiza máis lúcida, somos un pouco mellores, un pouco máis entregados ás grandes causas da recuperación cultural do país. 
 
Nun día como o de hoxe, rendimos a María Victoria un tributo de homenaxe e identificación coa cidade que tan orgullosa se sente de tela tido como veciña, mestra.

María Victoria Moreno xa ten unha placa no edificio no que residiu...
Comentarios