A escritora Marilar Aleixandre, o humorista gráfico Xaquín Marín, o actor e director Quico Cadaval e a cantante María Xosé Silvar, Sés, son os galardoados co premio Bos e Xenerosos que cada ano concede o Festiletras, iniciativa que se celebra en Ponteceso do 16 ao 20 de maio.
A organización explicou que, con 36 anos de historia, a festa que a Aldea do Couto celebra ao redor do Día das Letras Galegas continúa crecendo e innovando con propostas como a Festiciencia, a primeira feira científica nun ámbito rural.
Á cita achegaranse personalidades da ciencia pero tamén da música, do teatro e, por suposto, das letras. Todas elas achegaranse durante cinco días pola Fundación Eduardo Pondal e a Casa dos Veciños do Couto, centros neurálxicos da celebración.
Así, cada día, en horario de mañá, tarde e noite, levarán a cabo un gran número de actividades aptas para todos os públicos e gustos. Ademais de actuacións musicais, talleres e charlas haberá espectáculos para os máis pequenos.
Entre outros, actuarán Terbutalina e Sés, e participarán profesores como Jorge Mira ou o artista e escritor Xurxo Souto.