A actuación da cantante e compositora coruñesa Silvia Penide inaugurará esta serie de actuacións o 25 de xuño. Farao cun concerto ao que lle seguirá, ao día seguinte, un show titulado Zona en obras, a cargo do músico e contador Brais das Hortas.
Silvia Penide, que gañou dous premios Martín Códax da música galega, ten publicados oito traballos discográficos. O último, que será o que presentará en directo no Museo, é Los días de plomo. No caso de Brais das Hortas "promete un espectáculo interactivo de narración, música e monicreques para crianzas", indica a Deputación de Pontevedra.
A cita do mes de xullo será de contacontos o sábado 31 coa Trastenda dos contos a cargo de Caxoto e non haberá espectáculo musical xa que coincide co ciclo Sons na Praza, que tamén organiza o Museo de Pontevedra. Cunha traxectoria vinculada nos seus inicios á editorial Kalandraka, Felipe Díaz Caxoto está detrás do mostrador desta Trastenda dos contos, "un proxecto nado no 2012 para que a narración oral conflúa con outras disciplinas artísticas, actividades lúdicas, artes escénicas, contidos educativos, a formación en valores ou o enfoque social", explican os seus responsables.
En agosto, o día 27, o concertó será de Pablo Lesuit, que despois de publicar o ano pasado o álbum Belorizonte con Esmerarte acaba de lanzar unha nova canción, Hasta que me creas, e o espectáculo de contacontos , de Raquel Queizás, que presentará Onda min.
Emprazarte rematará en setembro cun concerto de Eladio y los Seres Queridos, en formato dúo, o día 24 e coa proposta Contos para dar e tomar, de Artestudio Teatro, ao día seguinte.
A entrada para todas as actuacións é de balde con reserva previa en [email protected].
