"Para Pontevedra é unha honra que o percorrido da exposición remate aquí",dixo a concelleira Carme da Silva, este venres, na inauguración, na Praza de España, da mostra 100% María Casares. O teatro é o refuxio, que a Xunta de Galicia montou para conmemorar os cen anos do nacemento da actriz galega e que ten como comisaria á xornalista Arancha Estévez, autora da primeira biografía que se escribiu sobre a intérprete (1999). "Foi unha muller extraordinaria, xenerosa e exemplar ata o final da súa vida", sinalou a comisaria, que estivo acompañada polo director xeral de Cultura, Anxo Lorenzo.
A mostra, que repasa de xeito cronolóxico a vida de María Casares e que inclúe fotos pouco coñecidas como unha que ten co cineasta Jean Cocteau, comezou a súa itinerancia en abril en Santiago de Compostela e remátaa agora na capital da provincia. Composta por unha serie de paneis engarzados en forma de estrela e con deseño da empresa Era Comunicación, de Pontevedra, permanecerá instalada na Praza de España ata o 2 de novembro.
Foi unha muller extraordinaria, xenerosa e exemplar ata o final da súa vida
"María Casares é unha das grandes personalidades galegas", explicou Arancha Estévez, que contou como, dentro dese conxunto de historias tristes, de derrotas e fracasos que é o exilio, a súa foi unha historia de éxito no país que a recibe. Nacida na Coruña en 1922, é filla do ministro republicano Santiago Casares Quiroga, "un dos políticos máis importantes do século pasado". Con 14 anos exíliase coa súa familia en Francia, a onde chega sen falar o idioma e acaba, ao pouco tempo, converténdose en primeira actriz.
"A partir dese momento a súa vida é un percorrido pola historia do século XX acompañada por algunhas das máis importantes figuras da época, de Albert Camus a Pablo Picasso pasando por Agnès Varda e Jean Cocteau". A exposición percorre a biografía de María Casares seguindo unha liña temporal dende que abandona Galicia ata que empeza a recibir unha chea de recoñecementos ao final da súa traxectoria. O seu éxito na Francia dos anos 40, a súa relación con Albert Camus, as incursións no cine, o seu paso por Latinoamérica e o encontro co exilio galego, Xenerosa e exemplar ata o final, a experimentación teatral e a volta a España da man de Rafael Alberti son algúns dos capítulos da vida da actriz nos que a mostra fai fincapé.