O conselleiro de Cultura e Turismo, Roberto Varela, reuniuse esta tarde cos membros do Padroado do Centro Galego de Arte Contemporánea, CGAC, aos que lles presentou as bases do concurso internacional a través do que sairá elixido o novo director do devandito centro.
Un dos requisitos fundamentais nas bases do concurso será a presentación dun proxecto que defina os fins, valores, liñas, programas e obxectivos que os candidatos se propoñen conseguir ou desenvolver. Segundo os principios adiantados polo conselleiro, o proxecto de dirección do CGAC deberá ter en conta a opinión, participación e logro do máximo consenso posible entre os expertos e interlocutores do mundo da arte. Ademais, deberá relacionar o proxecto artístico co esforzo económico esixido, tanto na construción ou rehabilitación do edificio, como nas adquisicións, programas e persoal.
Acreditar experiencia na dirección ou xestión de museos ou centros de arte contemporáneo, coñecer ou ter vinculación co medio cultural e artístico galego e internacional, así como posuir unha titulación universitaria con nivel de licenciatura son algúns dos requisitos que tera que cumplir o futuro director. Ademáis, serán valorados os traballos de creación artística, os científicos, publicación e recoñecementos académicos no ámbito da cultura e da arte contemporánea.
O candidato deberá presentar un informe/memoria coas liñas xerais do seu proxecto para o Centro Galego de Arte Contemporáneo, cun horizonte de cinco anos. Deste xeito, trátase de desvincular o seu mandato da duración dunha lexislatura política e de garantir o desenvolvemento do programa.
O primeiro director elixido por concurso internacional
É a primeira vez, nos seus dezaseis anos de funcionamento, que o CGAC contará cun director elixido a través dun concurso internacional no ámbito europeo. O obxectivo deste proceso, que ten como base o documento cero do sector da arte contemporánea sobre boas prácticas en museos e centros de arte, é mellorar a imaxe pública do museo, facer del un centro que achegue a arte moderna a todos os galegos e que sexa cita obrigada para os visitantes de Santiago de Compostela, cunha programación de incuestionable calidade a nivel internacional.
Estas boas prácticas relaciónanse estreitamente co papel social dos museos e centros de arte contemporáneo e precisan do establecemento dun proxecto cultural ben definido, sobre o que estarán basadas tódalas actuacións. É decisión da Consellería de Cultura e Turismo aplicar estes criterios unha vez avaliadas as experiencias previas noutros centros como o Museo Nacional Centro de Arte Reina Sofía, Museo de Arte Contemporáneo de Barcelona, Museo de Arte Contemporáneo de Castilla y León ou o Museo Picasso de Málaga.
