domingo. 18.04.2021 |
El tiempo
domingo. 18.04.2021
El tiempo

O Pazo da Cultura pon á venda as entradas para o concerto de Sés en maio

Sés. ADP
Sés. ADP
Será o día 22 e comezará ás 20.00 horas por mor do toque de queda

As entradas para o concerto que Sés ofrecerá o 22 de maio no Pazo da Cultura de Pontevedra están á venda en ataquilla.com, segundo vén de informar o Concello. É a terceira vez no último ano que a artista trata de actuar en Pontevedra, tras ter que adiar ata en dúas ocasións o seus espectáculo a causa da pandemia.

Sés tiña previsto presentar na cidade o seu último traballo, Liberar as arterias, en maio do ano pasado. O estado de alarma obrigou a trasladar a actuación a novembro, cando as restricións volveron levar aos organizadores a pospoñelo. Finalmente a data elixida para o concerto é o 22 de maio. O horario tamén se adecuou ás circunstancias: a actuación dará comezo ás 20.00 no canto de ás 21.00 horas para permitir o cumprimento do toque de queda.

O Concello lembra que, na actualidade, o Pazo da Cultura conta cunha capacidade de 123 butacas distribuídas en parellas de cadeiras.

SÉTIMO DISCO. Liberar as arterias é o sétimo disco de María Xosé Silvar, Sés, que debutou con Admirando a condición en 2011. A artista coruñesa é unha habitual nos escenarios de Pontevedra onde conta cunha lexión de seguidores e onde ten actuado en diferentes ocasións no Teatro Principal, no Pazo da Cultura e nas Festas da Peregrina.

As entradas para o seu concerto de maio teñen un prezo de 17 euros (máis gastos). De non esgotarse online, poñeranse á venda no Pazo dúas horas antes do concerto.

O Pazo da Cultura pon á venda as entradas para o concerto de Sés en...
Comentarios
ç