Festa rachada a que montou a cativada, este mércores ao mediodía, na Alameda de Pontevedra. O Correlingua, esa carreira escolar en defensa do idioma que organiza cada ano a asociación do mesmo nome, co apoio do sindicato CIG-Ensino, da Mesa pola Normalización Lingüística e da Asociación Socio-Pedagóxica Galega, así como das deputacións de Pontevedra, A Coruña e Lugo e dos concellos de Santiago, A Coruña, Ourense, Pontevedra, Vigo e Lugo, chegou á cidade para celebrarse por todo o alto e xa sen ningún tipo de restrición.
Vinte centros escolares de Pontevedra e da contorna participaron no evento, que rematou cunha festa no palco da música da Alameda presentada por Fran Rei (que leu o manifesto deste ano, titulado Na casa, na escola, bota a lingua fóra) e coa participación da banda As Monchas.
Este ano, segundo informou a organización, houbo dous percorridos distintos pola cidade en función da idade do alumnado.
De Pontevedra estaban inscritos o CEIP Espedregada, o CEIP A Xunqueira 2, o CEE Pontevedra, o CEIP Praza de Barcelos, o IES A Xunqueira 1, o CEIP Parada Campañó, o CEP Campolongo, o CEIP Manuel Vidal Portela, o CEIP San Martiño, o CEIP Santo Andrés de Xeve, o IES Luís Seoane, o IES Frei Martín Sarmiento, o CEIP Daría González García e o CEP Marcos da Portela. De Poio, o CEIP Isidora Riestra e o IES de Poio. De Ponte Caldelas, o IES Pontecaldelas. De Vilaboa, o CPI do Toural. De Portas, o CPI Domingo Fontán. E de Soutomaior, o CPR Santiago Apostol.
