Os propios Pavís Pavós, xunto ás compañías Baobab e Migallas e ao colectivo Polo Correo do Vento, protagonizarán o espectáculo de contacontos co que se festexará a data en Pontevedra. Será no Teatro Principal (12.00 horas) coas medidas de seguridade vixentes (agora mesmo, con 98 butacas dispoñibles). As invitacións para asistir poden retirarse de balde en ataquilla.com.
Xacobe Rodríguez, de Pavís Pavós, e a concelleira de Festas, Carme da Silva, explicaron este luns que a proposta galega conta cun manifesto redactado pola escritora e membro da Real Academia Galega (RAG) Fina Casalderrey. "Como diría o gran contador galego Xabier P. Docampo, contar é o acto de amor máis sublime que un ser humano pode realizar", di no texto.
Segundo explicou Pavís Pavós, a conmemoración do 20 de marzo comezou en Suecia en 1991 para estenderse rapidamente por todo o mundo. "Galicia non podía quedar fóra. Así que este ano fixemos chamamentos a bibliotecas, institucións e contadores, e todo o mundo respondeu moi ben".
A presentación dos actos do Día da Narración Oral serviulle ao Concello para facer unha reivindicación da cultura en vivo. "Esta é unha data festiva e reivindicativa", dixo Rodríguez. "No confinamento, a xente da narración oral fixo o que puido para axudar a levar un momento tan duro e estraño. Despois vimos as nosas actuacións suspendidas e adiadas. Agora é tempo de reclamar que a cultura é segura".
