A dramaturga, actriz e directora pontevedresa Marta Pazos aliouse coa actriz e cantante Christina Rosenvinge na posta en escena Safo Fragmento 36, que se estreará no Festival de Teatro Clásico de Mérida no mes de xullo. "Safo non é a musa, é o xenio", di Pazos, en palabras facilitadas polos responsables de comunicación da obra. "As artistas visitarán por primeira vez o Teatro Romano da localidade estremeña cunha proposta que percorre o universo da gran poeta de Lesbos, venerada e enigmática, que compuxo máis de dez mil versos, dos que apenas nos chegaron poemas completos", sinalan dende a produción.
Christina Rosenvinge asina a dramaturxia da peza, xunto a Pazos e María Folguera, e asume, ademais, a dirección musical e a interpretación de Safo, así como a composición das cancións orixinais que poderán escoitarse no espectáculo. E é que, segundo din, a obra está concibida como un poema visual, musical y escénico.
A posta en escena transita entre o oculto e o revelado. Safo asolágao todo
Para este traballo, a directora de escena pontevedresa inspirouse en referentes como Vanessa Beecroft, Paula Rego, Patty Carrol, Mathew Barney, Ángela de la Cruz ou Christo and Jeanne- Claude. En palabras de Pazos: "A posta en escena de Safo Fragmento 36 transita entre o oculto e o revelado. Nun diálogo constante entre o que se perdeu e o que permaneceu ao longo dos séculos, a plástica escénica xira en torno ao estudo da propia iconografía da poeta. Safo asolágao todo", explica Pazos. "O sol de Lesbos desaparece e ela é unha choiva encantadora que derrite os corpos de mármore, que toman vida. Aparece coa súa lira dourada e o ouro salpica as imaxes simbólicas que a través do corpo palpitante as intérpretes que forman paisaxes de tempo suspendido". E remata: "O propio teatro é Safo e, como o corpo da poeta en numerosas representacións, aparece envolto por tecidos cor peonía como flores de ramo de noiva. A arquitectura está ante os ollos, pero non se revela completa, do mesmo xeito que na propia historia da poeta, onde sempre hai algo que non deixa ver a súa xenialidade de forma plena".
No elenco de Safo Fragmento 36, unha coprodución de Teatre Romea, Festival Internacional de Teatro Clásico de Mérida e Grec 2022 Festival de Barcelona, destacan figuras da escena musical contemporánea como Irene Novoa, Xerach Peñate, Lucía Rey ou Juliane Heinemann, que acompañan sobre as táboas á propia Rosenvinge
