A banda tributo de Dire Straits (grupo de rock británico liderado por Mark Knopfler) Real Straits ofrecerá un concerto en Pontevedra dentro da súa xira galega. Actuará o 10 de novembro no Pazo da Cultura (22.00 horas; entradas á venda en ticketea.com e Café Tertulia; 24,20 e 22 euros), un día despois de telo feito na Sala Rouge de Vigo e un antes de facelo na Sala Capitol de Santiago de Compostela.
O guitarrista Ángel Miguel é o encargado de asumir o papel de Knopfler nesta agrupación na que tamén militan Dany León (guitarra), Samuel Rodríguez e Fernando Chacón (teclados), Alejandro Blanco (batería), Antón Ceballos (baixo) e Juan Flores (saxo). Tamén participan ou teñen participado en Real Straits músicos de Ilegales, Elliot Murphy ou Avalanch, segundo indican os promotores da actuación.
Tras celebrar o 30º aniversario da publicación dun dos discos máis importantes da banda británica, Brothers in Arms, Real Straits realizan agora unha xira para conmemorar o que é o 40º aniversario da fundación do grupo de Knopfler (1977). O título do novo espectáculo é The Real Story of Dire Straits.
"Se trata de un recorrido histórico a través de esta música eterna, dejando patente cada una de las épocas y cada uno de los discos, con una propuesta apasionante y única", din os responsables da actuación. "A través de este viaje, el público revivirá, nota a nota, canción a canción, la que ha sido la banda sonora de sus vidas".