A Universidade de Santiago (USC) ofertará o vindeiro curso un total de 1.315 prazas en residencias e colexios maiores. Subvencionaranse todas as prazas asignadas ós estudantes cunha renda persoal dispoñible inferior ós 9.000 euros, que oscilarán entre os 43 e os 205 euros. Para o resto dos alumnos os prezos iran de 234 a 273 euros.
Continúa a redución de prazas
Este ano continua a tendencia iniciada no curso 2002-2003, cunha redución progresiva e constante do número de prazas. Naquel curso universitario ofertáronse 1.780 prazas fronte ás 1353 do curso presente ou ás 1.315 previstas para o 2007-2008.
Dende o Reitorado sempre se apuntou á baixada do número de estudantes matriculados, malia que o descenso de prazas en residencias é maior en termos relativos. Se no intervalo 2002-2007 o número de alumnos baixou nun 15% (case 5.400 menos) o de prazas reduciuse case nun 25%.
No ano 2004, un ano despois da elección de Senén Barro como novo reitor, pechouse a residencia “Monte do Gozo”, recortando 300 prazas do Sistema Universitario de Residencias (SUR) alegando que non se chegaban a cubrir.
Oferta de prazas
Para o vindeiro curso, a distribución das prazas será:
- 1060 para estudantes de 1º e 2 ciclo
- 105 para alumnos de 3º ciclo e investigadores en formación
- 95 para estudantes de programas de mobilidade e intercambio
- 27 para membros incapacitados da comunidade universitaria
- 20 para estudante de pos grado propio e o Curso de Aptitude pedagóxica
- 8 para persoal docente e investigador e de administración de servizos
O prazo para a presentación de instancias permanecerá aberto ata o 6 de xuño no caso de persoas interesadas na readmisión e para estudantes de mobilidade e intercambio nacional e ata o 13 de xuño para solicitudes de nova admisión. O 1 de agosto publicaranse as listas provisionais. O formulario pode descargarse vía web.
