Finalmente, o escollido foi o Poeta do Courel. Uxío Novoneyra será o homenaxeado o Día das Letras do 2010, ano no que se cumpre o décimo aniversario do seu pasamento. A Real Academia Galega escolleu o seu nome de entre o resto dos candidatos, pese a que moitos deles levan tempo soando nas quinielas. O lucense competía man a man co pensador ferrolán, Ricardo Carvalho Calero, que terá que seguir agardando.
Novoneyra nace o 19 de Xaneiro de 1930, na aldea de Parada de Moreda, en plena serra do Courel, dentro dunha familia labrega acomodada. O futuro escritor pasa a nenez e mocidade neste marco xeográfico courelán da Galicia arredada que segue conservando nese momento os seus tradicionais modos de vida e que conformará cos súa particular impronta as experiencias básicas da futura creación poética do autor, de inspiración esencialmente telúrica. Da mesma maneira, o ambiente histórico represivo da convulsa situación da década dos trinta e comezos dos corenta, que coincide cos anos de nenez e mocidade, deixarase ver máis tarde na súa poesía.
Relacionado durante a súa xuventude con intelectuais e artistas como Manuel María, Luis Pimentel, Anxel Fole ou Ramón Piñeiro, volveu a residir no Courel entre os anos 1953 e 1962, unha volta que deixou unha profunda pegada na súa obra. Morreu en Compostela no 1999.
Mil sinaturas respaldaron a súa candidatura
O vindeiro 30 de outubro cumpriranse dez anos do seu pasamento, e a asociación Amigos de Uxío Novoneyra leva dous recollendo sinaturas para que o traballo do lucense non caese no esquecemento.
O pasado mes de abril entregáronlle ao presidente da Real Academia máis de mil sinaturas, entre as que se atopaban a do tamén escritor Agustín Fernández Paz --"Chegaría un único verso para apoiar a candidatura ('Non, a forza do noso amor non pode ser inutle!')"--, e a do cantautor Miro Casavella --"Imprescindibel o nomeamento de uxio pra as letras galegas do 2010 e o gran poeta de galiza e da sua natureza natureza. Galicia, será a miña xeneración quen te salve, irei un dia do Caurel a Compostela por terra liberada..."--. Unha 'mensaxe subliminal' do apoio social co que había detrás da candidatura do poeta.
Así as cousas, as Letras do 2010 serán para Novoneyra. E mentres, entre os mozos seguirá a circular a mesma pregunta: "para cando Lois Pereiro?"
