Pontevedra acollerá, entre o 16 e o 18 de setembro, a primeira edición de Ferve, un evento que unirá cervexa, gastronomía e música na Alameda da man da axencia creativa e de management musical Esmerarte e da marca Estrella Galicia. "Isto é unha festa máis que un festival", anunciou Laura Fontán, de Esmerarte. "Terá carácter anual e será itinerante".
Segundo avanzaron os promotores da proposta, que conta co apoio do Concello de Pontevedra e da Xunta de Galicia, a través do Xacobeo, Ferve incluirá concertos de Xoel López, Baiuca, Marilia Monzón e a banda do programa de televisión Late Motiv, que lidera o galego Pablo Novoa. A estes nomes xa confirmados iranse unindo outros, segundo dixeron os responsables da proposta. O acceso ás actuacións, como ao resto das propostas, será de balde.
Ferve tamén incluirá degustacións de pinchos de autor a prezos populares de máis dunha ducia de cociñeiros; palestras e encontros profesionais sobre a relación entre a gastronomía e a ciencia ou sobre os comedores ecosostibles, entre outros temas; showcookings; talleres sobre a cultura da cervexa e mercados tanto de artesanía como de produtos gastronómicos. Entre os chefs que participarán nas actividades están os galegos Iñaki Bretal e Héctor López. Do resto de España virán, por exemplo, Diego Guerrero e Vicky Sevilla. E haberá dous cociñeiros chegados dende Brasil e Panamá.
Ademais de Laura Fontán, na presentación de Ferve, este xoves, estiveron a manager de cultura, proximidade e gastronomía en Hijos de Rivera, Goretti Castro; o concelleiro de Desenvolvemento Sostible, Iván Puentes, que vinculou a celebración do evento á marca Pontevedra Capital Gastro, e o delegado territorial da Xunta de Galicia, Luís López.