A xornalista Montse Fajardo gaña o Premio Selic na categoría de ensaio

A escritora fíxose co galardón pola obra 'Onde habita a tolemia', que visibiliza a enfermidade mental
A escritora e xornalista Montse Fajardo. JOSÉ LUIZ OUBIÑA
photo_camera A escritora e xornalista Montse Fajardo. JOSÉ LUIZ OUBIÑA

 A escritora e xornalista Montse Fajardo é a gañadora da sétima edición dos Premios Selic de creación literaria na categoría de ensaio pola súa obra Onde habita a tolemia, tal e como informou o Concello de Santiago de Compostela.

No libro, a autora visibiliza a enfermidade mental e a represión institucional que se levou a cabo contra as mulleres nunha historia ambientada nun manicomio de Compostela.

O xurado do premio, convocado polo Concello da capital galega, considera a obra merecedora da edición deste ano polo "interese da temática e o achegamento á cidade desde unha perspectiva rara", posto que se centra "nunha institución cunha presenza fundamental en Compostela e visibiliza a enfermidade mental"

O xurado tamén valorou a capacidade da autora para revelar "unha mirada da represión institucional contra as mulleres psiquiátricas na posguerra e narra emocionantes historias de vida cunha polifonía de voces".

A gañadora do Premio Selic recibirá unha recompensa económica de 6.000 euros e a súa obra publicarase na colección publicada polo Concello.

A autora

Veciña da cidade de Pontevedra, Montse Fajardo (Vilagarcía, 1973) é licenciada en Ciencias Políticas, mais a súa traxectoria profesional está vencellada ao xornalismo, especializándose nos últimos anos en memoria histórica e feminismo. 

Ata o pasado mes de xullo foi técnica de Memoria Histórica na Deputación de Pontevedra. Coordinou o proxecto A memoria das mulleres, promovido polo Concello de Pontevedra así como as xornadas Na loita contra a impunidade.
A xornalista destaca tamén pola súa faceta de escritora. Así, asinou títulos como Matriarcas (2012); Un cesto de mazás (2015); Invisibles (2017), texto que recolle o testemuño de varias mulleres vítimas de violencia de xénero que foi levado ao teatro; O escalón de Ulises (2018) e A vida incerta (2020).

No ano 2018 Fajardo alzouse co Premio de Xornalismo Lueiro Rey polo artigo O universo de Carlos.

Comentarios