sábado. 23.01.2021 |
El tiempo
sábado. 23.01.2021
El tiempo

A Xunta redobla o apoio ao Culturgal con 65.000 euros e máis actividades

Unha imaxe do espectáculo 'Ópera Break's', con Vella Escola, do Fondo de Proxectos Culturais Xacobeo 2021. DP
Unha imaxe do espectáculo 'Ópera Break's', con Vella Escola, do Fondo de Proxectos Culturais Xacobeo 2021. DP
Cultura promove na programación do evento os concertos de Susana Seivane, Luar na Lubre e Os d'Abaixo, así como as montaxes escénicas Sofía unipersonal, Karelu e Ópera Break's

A Xunta de Galicia, a través da Consellería de Cultura, Educación e Universidade redobla o seu apoio ao Culturgal-Feira das Industriais Culturais, que se celebrará desde este venres e ata o domingo en Pontevedra. Este ano, non só achega os 65.000 euros do patrocinio, senón que aportará un bo número de actividades á axenda do evento, entre elas seis actuacións e concertos ao vivo procedentes do Fondo de Proxectos Culturais Xacobeo 2021.

A administración autonómica ten un papel moi relevante co seu apoio ao Culturgal, aínda que o seu traballo, lonxe de rematar coa celebración deste evento, levase a cabo ao longo de todo o ano como promotora que intervén de xeito determinante na creación e desenvolvemento de servizos e produtos culturais galegos.

Nesta edición, a Asociación Culturgal decidiu cambiar o formato do evento, adoptando unha fórmula semipresencial como consecuencia das restriccións aprobadas para facer fronte ao avance do covid-19. En todo caso, mantén as datas de celebración, aínda que prescindirá dos habituais expositores que as compañías instalaban no Recinto Feiral de Pontevedra.

A obra Karelu, da compañía Os Náufragos Teatro. DP
A obra Karelu, da compañía Os Náufragos Teatro. DP
 

ACTUACIÓNS AO VIVO. Dentro de ampla e variada axenda da Xunta na Feira, destacan seis actuacións e concertos ao vivo. Polos escenarios pasarán Susana Seivane (sábado 28, ás 18.30 horas), Luar na Lubre (sábado, ás 20.30 h.) e Os d'Abaixo (domingo 29, ás 20.00 h.), así como as montaxes escénicas Sofía unipersonal, de Inversa Teatro (sábado, ás 21.00 h.); Karelu, de Os Náufragos Teatro (domingo, ás 13.00 h.), e Ópera Break's, de Vella Escola (domingo, ás 19.15 h.).

A participación da Xunta en Culturgal, por medio da Axencia Galega das Industrias Culturais (Agadic), non só é económico, e os distintos departamentos da Consellería de Cultura participan activamente nesta citas, na que se dan a coñecer proxectos propios ou levados a cabo en colaboración con outras entidades e axentes do sector en todos os ámbitos de manifestación das empresas creativas e culturais.

Este ano, particularmente e no actual contexto sociosanitario, a Xunta renova aínda con máis firmeza e seu apoio ao Culturgal como medio de refrendar a todas as empresas culturais galegas. Moitos dos proxectos culturais que puideron saír adiante este ano grazas ás medidas do Plan de reactivación do sector cultural, deseñado e posto en práctica polo Goberno galego para facerlle fronte aos efectos da covid-19, poderán verse no Culturgal e tamén, con toda seguridade, nas edición dos próximos anos.

Retransmisión. Na actual edición, na que a organización decidíu, ante o avance da pandemia e das medidas adoptadas polas autoridades sanitarias, facer un evento semipresencial e sin expositores, a Xunta renova especialmente o seu compromiso co Cultural, na súa aposta por levar o evento a máis público a través da ampla retransmisión en liña organizada pola propia feira, que amplificará a proxección social das industrias culturais galegas para seguir chegando aos seus destinatarios dadas as actuais restricións sanitarias.

Sen dúbida, o propio Culturgal é un destes axentes que reaccionaron coa solvencia dun novo formato completamente renovado para manter a actual edición.

Dentro da programación da Feira das Industrias Culturais, esperta un interese especial unha das proxeccións inaugurais en Culturgal do filme Ons, de Alfonso Zarauza e producido pola produtora galega Maruxiña Film Company, que chega a Pontevedra despois da súa estrea galega no marco do festival compostelán Cineuropa.

A película foi realizada cunha subvención da Xunta de Galicia, igual que outros dos títulos que conforman o apartado audiovisual do evento pontevedrés, tales como Arima, A illa das mentiras, Longa noite e A media voz. No seu conxunto, esta carteleira cinematográfica expresa o bo momento creativo que esta a vivir o noso audiovisual, con presenza e recoñecementos nos principais festivais de todo o mundo.

'Pontevedra, cuna de Colón', en versión polícroma
A Consellería de Cultura, Educación e Universidade promove na feira, que se celebrará en Pontevedra desde mañá venres, a proxección o domingo da restaurada versión polícroma do documental de 1927 Pontevedra, cuna de Colón, peza de Enrique Barreiro e pioneira na experimentación para dotar de cor a imaxe cinematográfica.

Culturgal será tamén o escenario para a presentación de diferentes iniciativas da Xunta de Galicia no ámbito da cultura dixital, da promoción da economía social e da dinamización lingüística co programa Galego e +, así como da actividade da Cidade da Cultura de Galicia co festival Escenas do Cambio e as exposicións Galicia de Nós a nós e As miradas de Isaac, ou as producións que prepara o Centro Dramático Galego, entre outras.

Un gran escaparate
A Feira das Industrias Culturais, que cada ano se celebra en Pontevedra, é un magnífico escaparate para amosar as creacións galegas, que tanto recoñecemento están a colleitar.

A Xunta redobla o apoio ao Culturgal con 65.000 euros e máis...
Comentarios