O deporte de contacto volve estar permitido, en determinadas circunstancias, en Galicia. Tras semanas de numerosas dificultades para clubs e deportistas para adestrar polas restriccións da Xunta por mor das cifras de contaxios pola Covid-19, o goberno autonómico moveu ficha. Fíxoo coa publicación dunha orde que levanta certas restriccións para non provocar desvantaxes competitivas dos atletas da comunidade en relación con outros competidores.
O Diario Oficial de Galicia de onte incluiu a "Orde do 27 de agosto de 2020 sobre modificación de determinadas medidas previstas no Acordo do Consello da Xunta de Galicia, do 12 de xuño de 2020, sobre medidas de prevención necesarias para facer fronte á crise sanitaria ocasionada polo COVID- 19". Este novo documento regulador púxose en marcha, segundo a Xunta, "unha vez superada a fase III do Plan para a transición cara a unha nova normalidade".
Deste xeito, o executivo galego introduciu tres modificacións importantes sobre o acordo do 12 de xuño relativo á práctica deportiva. Por unha banda, permite adestrar desde este venres con contacto aos "mellores" deportistas galegos. Por outra banda, tamén inclúe aos atletas con necesidades específicas en deportes adaptados. Por último, establécese a posibilidade de realizar tarefas sen impedimentos os colectivos non profesionais pero que militen en categoría estatal.
A Xunta destaca que no primeiro caso, referido aos deportistas de alto nivel (recoñecidos pola Xunta ou polo CSD), "os adestramentos deberán celebrarse en grupos estables, permitíndose a participación necesaria de ‘sparrings’, e suxeitos a medidas de protección específicas".
Mentres, no caso dos deportistas de especialidades adaptadas, "os adestramentos estarán suxeitos a medidas de protección específicas que serán comunicadas á autoridade deportiva autonómica para o seu coñecemento e supervisión, e sempre realizados en grupos estables de adestramento".
Xa no terceiro caso, no dos equipos que participan en competicións non profesionais de ámbito estatal, a práctica de adestramentos e a competición deberá realizarse en grupos de composición estable e suxeitarse a un protocolo en que se teñan en conta medidas de protección específicas.
PROTOCOLOS. Para que os equipos e os deportistas adquiran o permiso para adestrar, as autoridades deportivas e sanitarias de Galicia deberán recibir e aprobar un protocolo específico para a realización da práctica deportiva. Este documento deberá incluir, como mínimo, as medidas sanitarias aprobadas no Fisicovid-Dxtegalego, un texto que foi publicado en xuño como marco desde o que desenvolver medidas para facer fronte á crise sanitaria no eido deportivo.
Ademais, as competicións oficiais non profesionais de ámbito estatal celebradas en Galicia deberán axustarse ao protocolo respectivo da federación española competente, sempre que non contraveñan o disposto polas autoridades autonómicas. Se as devanditas federacións entenden como necesario facer cambios a estes documentos, deberán contar co permiso da Xunta ou da aprobación do Consejo Superior de Deportes.
