O equipo granate adiantouse na primeira parte cun gol en propia meta de Jesús Muñoz tras un centro de Romay.
Foi ao cuarto de hora de partido. Desde ese momento o Guijuelo foi superior, xerou perigo en ataques organizados e no balón parado e puido igualar en diferentes situacións. Non o logrou na primeira metade, pero si despois do descanso nunha gran xogada colectiva que acabou con centro de Raúl Ruiz e remate en propia porta de Nacho López.
O Pontevedra tomou a iniciativa a partir dese momento, pero sen excesivo perigo. A aparición de Pibe foi determinante. O cambadés forzou a expulsión de Razvan en dúas accións sancionadas con cartón amarelo e iso permitiulle ao cadro granate acurralar ao rival e marcar no minuto 84, nun centro de Borja Domínguez que cabeceou Rivera ao fondo da rede para darlle tres puntos de ouro ao cadro de Luismi.