28-15. O Cisne segue con vida tras derrotar o Basauri

O Cisne Mundo de Sepo derrotou con claridade ao Basauri na segunda xornada do sector e mantén vivas as súas opcións de conseguir o pasaporte para o Campionato de España. O equipo pontevedrés precisa gañar este domingo á mañá contra o Ikasa Madrid na última xornada e que non o faga o Galdar perante o Basauri. No caso de os canarios venzan, o conxunto da cidade do Lérez precisaría unha goleada por sete ou máis goles fronte ao seu contrincante para lograr o seu propósito.

A escadra da cidade do Lérez foi moi superior ao seu rival do sábado. O inicio do partido estivo equilibrado e mesmo o conxunto vasco estivo por diante no marcador, grazas ao acerto desde o pivote e o extremo. O Cisne tiña problemas para atopar opcións claras de lanzamento e chocaba constantemente contra a seria defensa rival. De tal maneira viuse cun 2-4 no marcador xa superado o minuto dez.

A partir de aquel momento, os dous equipos entraron nunha fase de erros nos lanzamentos, perdas e malas decisións que provocaron que no minuto 15 o tanteador rexistrase un 4-4.

Foi daquela cando o Cisne Mundo de Sepo deu un paso adiante e rachou o marcador. A aparición do latigazo de Xoán Lago desde o lateral esquerdo unido aos roubos e contras do colectivo lerezano levaron o duelo a un 9-4 que deixaba a situación moi favorable aos brancos. Non tardou en unirse á festa Adrián Lago coa súa movilidade e habilidade en primeira liña para atopar a liña de seis metros. Nun intre, o partido estaba practicamente sentenciado con diferenzas moi amplas (13-6) ao descanso para os locais.

Na rotación do bloque cisneísta volveu aparecer outro dos laterais esquerdos, Pablo Pazos, para exhibir músculo desde a liña de nove metros. Mención especial para a calidade nas accións de 2 por 2 co pivote, Pedro Ángel, moi resolutivo na finalización.

O segundo acto moveuse sempre con absoluto control tanto no marcador como no xogo por parte da escadra preparada por Pablo Sixto, que ata ben entrada a segunda metade dobraba no marcador ao Basauri. A situación facilitou a rotación dos xogadores do equipo lerezano que puideron gozar do partido diante da súa afección.

Hoxe, ás doce, comezará o partido que servirá para resolver o torneo. O Ikasa parte coa vantaxe da súa contundente vitoria contra o Galdar no caso dun triple empate a catro puntos. Ao Cisne convenlle a derrota ou empate do cadro canario fronte ao Basauri para que lle baste o triunfo.