O Cisne Los Sauces escalou un chanzo máis en dirección á fase final do Campionato de España, despois de derrotar ao Grupo Covadonga de Xixón por 42- 33 na segunda xornada do seu sector. Ademais, o triunfo do Gáldar sobre o teórico favorito do grupo, o Ademar León, permítelle á escadra de Óscar Arosa ter un pequeno colchón de cara á ultima xornada, na que lle vale o empate fronte os leoneses e, se vence o Galdar perante o Grupo Covadonga no partido anterior, ata unha derrota por un tope de dous goles.
O duelo estivo máis equilibrado do que reflectiu o marcado final. De feito, o Cisne viuse cun 2-5 en contra aos poucos minutos de xogo mercede á falta de puntería dos seus finalizadores e a actuación do porteiro asturiano Nicolás Menéndez. O Grupo corría e acertaba para fuxir no electrónico.
A solución foi inmediata, cun 5-0 de parcial cisneísta, amparado no incremento da tensión defensiva, as perdas do rival, o bo facer de Hugo Casal na porta e a aparición de Xoán na primeira liña. O Grupo sobrevivía coa conexión cos seus pivotes ante as dificultades desde os nove metros, pero na portería de enfronte o ataque posicional do Cisne facíase eficaz. O cadro pontevedrés tiraba de carácter e poderío físico para marchar no tanteador ata un 14-9.
Un tempo morto visitante mudou a dinámica do duelo e, mediante unha mixta a Xoán e a recuperación da orde ofensiva, os asturianos chegaron con viva ao descanso (18-16).
De volta dos vestiarios, unha dobre mixta pola dobre inferioridade do Cisne permitiulle ao Grupo acabar de darlle a volta ao resultado (21-22). O Cisne pasou os peores minutos, con dificultades para trenzar xogo ofensivo, correr e atinar coa porta nas finalizacións.
As dúbidas remataron en canto o bloque branco foi quen de defender e correr, coa frecha Pedro Fernández executando os roubos conseguidos por Roi García na zona avanzada ou na liña do 6-0.
Un parcial de 5-0 (27-23) devolveulle a dianteira aos lerezanos no envite. E desde ese momento, o duelo estivo controlado para eles ata nos momentos finais, nos que o equipo xixonés se colocou en defensa individual na procura de roubar e buscar unha remonta á desesperada. Non se produciu e mesmo se incrementou a diferenza ata o enganoso 42-33 que non fixo xustiza aos méritos amosados polo Grupo. Hoxe, contra o Ademar León, ás 12:00, a resolución do sector para os cisneístas.
