Ángel Rodríguez desvela a súa intención de seguir no Pontevedra CF

Ángel Rodríguez manifestou o seu interese por seguir vencellado ao Pontevedra na próxima campaña durante os actos de celebración que onte conduciron ao plantel, corpo técnico e consello de administración granates a Santiago e A Coruña, ao Pazo de Raxoi e ao MEGA.

En declaracións concedidas á Televisión de Galicia, o adestrador manifestou por primeira vez cales eran as súas pretensións de futuro. 

"Sí, me gustaría (continuar). Estoy muy a gusto en la ciudad", expresou o técnico, que destacou a estabilidade do proxecto como principal motivo para desexar ficar no banco de Pasarón durante un curso máis. "Se ve que el club va creciendo cada vez más y al final estos proyectos que mejoran año a año son ideales para crecer como entrenador y a nivel personal", expresou Rodríguez no Pazo de Raxoi, despois da recepción do equipo polo presidente da Xunta, Alfonso Rueda.

O Pontevedra agasallou cunha camisola co seu nome ao líder do executivo galego e con outra asinada a Estrella Galicia dentro dos fastos de celebración do ascenso

O preparador non manifesta présa ao respecto das negociacións. "Iremos contemplando las posibilidades que hay entre el club y yo y a ver si caminamos juntos de la mano", desexou.

Pola forma de expresalo, parece que haberá que agardar uns días para que se saiba se continúa ou non dirixindo desde a banda de Pasarón. "Ahora es el momento de disfrutar de estos actos de celebración que estamos viviendo, de disfrutar de la región hasta que lleguen las vacaciones".

A confirmación ao respecto da espera chega por parte de Lupe Murillo. No mesmo acto, momentos despois, a presidenta anticipou que ata a próxima semana non haberá ningunha negociación. 

Me gustaría (continuar). Estoy muy a gusto en la ciudad. El club va creciendo y estos proyectos son ideales para progresar como entrenador

"Aínda non falamos diso. Seguimos de actos e celebracións. Cando finalice esta semana, a próxima, comezaremos a falar de todo", expresou a dirixente, algo menos explícita ao expresar o seu desexo de que o actual técnico continúe formando parte da entidade.

As declaracións de Ángel Rodríguez e Lupe Murillo enmárcanse dentro dos actos festivos do ascenso. Este mércores foi a quenda para dúas recepcións: en Santiago por parte do presidente da Xunta, Alfonso Rueda, e no MEGA por parte dun dos patrocinadores da entidade, Estrella Galicia.

Rueda recibiu da presidenta  da entidade granate unha camisola da temporada co número 1 nas costas e co seu nome Alfonso. Na cita estiveron tódolos membros do plantel, corpo técnico e consello de administración por parte do club e unha ampla comitiva da Xunta co propio Rueda e o secretario xeral para o Deporte, José Ramón Lete Lasa, á fronte.

No seu discurso, o mandatario quixo parabenizar ao club da súa cidade e en especial aos protagonistas polo seu logro. Ademais, tivo tempo para inmortalizar o momento xunto ao Secre, un dos principais iconos do Pontevedra contemporáneo.

Despois do paso por Santiago e da procedente sesión de fotos, que incluiu unha na Praza do Obradoiro diante da catedral, a expedición continuou o seu itinerario en dirección ao Norte para acceder ao MEGA, Museo Estrella Galicia da Coruña. 

Alí tiveron tamén un obsequio dunha camisola enmarcada para un dos patrocinadores principais. Os xogadores puideron realizar unha visita polas instalacións, aprender a tirar a cervexa das billas habilitadas e ser obxecto das fotos conmemorativas.

A expedición recibiu a felicitación da empresa cervexeira, especialmente implicada co deporte galego, en particular co fútbol.

Este xoves chega o momento da recepción do plantel granate por parte da Deputación Provincial de Pontevedra. Ás 11.15 da mañá, no Pazo Provincial situado en Montero Ríos, o plantel granate será recibido pola presidenta Carmela Silva.