Ningún xogador do Pontevedra quere estar ausente no partido do domingo contra o Racing de Ferrol. Tódolos homes que tiveron molestias físicas ao longo da semana no bando dos granates puxéronse a disposición de Luismi de cara ao envite da fin de semana.
É o caso do arqueiro Edu Sousa, o primeiro en confirmar que estaría a disposición do técnico o domingo, no caso de que o vigués reclame os seus servizos. Edu sentiu molestias nun nocello no quecemento contra o Sanse, pero está recuperado.
Tamén está en condicións de disputar o envite o centrocampista Álex Fernández, que padeceu molestias na parte posterior do xeonllo durante o partido contra o equipo madrileño. Aínda que as primeiras sensacións non invitaban ao optimismo de cara a esta fin de semana, o ourensán adestrou co grupo estes días e está en condicións de ser convocado para a cita deste domingo.
As últimas dúbidas do técnico eran as de Jimmy e David Añón. O lateral esquerdo santiagués notou molestias o sábado da semana pasada, no último adestramento antes do desprazamento a Madrid. Finalmente disputou o partido, pero a sobrecarga na zona do abductor e o isquiotibial obrigoulle a traballar con prudencia ao longo desta semana. O santiagués manifestou estar en condicións de vestirse de curto ante o Racing se Luismi cre conveniente.
Pola súa banda, David Añón notou unha forte molestia no pube na sesión do xoves e tivo que parar. Non será motivo suficiente para apartalo dos terreos de xogo. O coruñés estará na lista de convocados, se non acontece nada estraño e se o adestrador o considera oportuno.
A pesar das dificultades da semana, Luismi poderá contar con tódolos seus homes para o derbi excepto Kevin Presa, que segue co seu proceso de recuperación.
