Antonio Serrat, entre os favoritos dunha Copa do Mundo de Pontevedra moi aberta

A Copa do Mundo de triatlón Pontevedra 2022 presenta un incerto prognóstico. A ausencia dos principais dominadores da modalidade a nivel internacional, tanto en categoría masculina como na feminina, permitirá ver cadansúa proba sen patróns nin patroas aparentes. A competición preséntase coa sensación de estar aberta a sorpresas dos emerxentes deportistas das seleccións máis potentes, ademais do teórico favoritismo dos deportistas cos dorsais máis baixos.

Antonio Serrat partirá co número 1. O vigués de Pontevedra sae coa vantaxe de correr na casa, diante da súa xente, por rúas que coñece á perfección para rodar na bicicleta e correr. O circuito non será un segredo para el.  

Serrat leva un ano con algúns contratempos, que non lle impediron facer un undécimo e un noveno posto nas probas das Series Mundiais de Yokohama e Leeds, respectivamente. Principiara o actual Mundial, coas dúas probas celebradas en 2021 como líder. Pero os problemas mecánicos e as caídas en Montreal e Hamburgo xeran dúbidas que espera poder resolver cando se produza o arranque da proba.

Sen tanto nome como Blumenfelt, Mola, Gómez Noya, Yee, Luis, Van Riel, Murray ou Wilde, a proba contará con deportistas dun gran nivel, moitos deles emerxentes, outros consolidados.

Entre eles brilla o número 2 da proba, o marroquí Jawad Abdemoula, que vén de facer podio nas Series Mundiais de Hamburgo, por detrás do neocelandés Wilde e o australiano Hauser, un dos moitos preinscritos que se deu de baixa da competición.

As ausencias das grandes estrelas do deporte abren un grande abano de posibilidades tanto en homes como en mulleres

A armada xermana aparece encabezada por Jonas Schomburg, membro do equipo olímpico e xa afianzado dentro da lista de saída das Series Mundiais, nas que logrou algún top-ten ao longo da súa carreira.

Tamén haberá que prestar atención ao suízo Max Studer, noveno nos Xogos Olímpicos de Tokio, décimo nas Series Mundiais de Hamburgo de hai dous anos e habitual usuario de prazas nobres en probas de Copa de Europa e Copa do Mundo. 

Inglaterra aparece na escena co subcampión de Europa actual á fronte. Barclay Izzard, aos seus 24 anos, formou parte da remuda inglesa que venceu en Hamburgo. Xunto con el, o veterán Thomas Bishop, un guerreiro cunha dilatada traxectoria no equipo inglés.

Entre os veteráns da proba hai que sinalar o nome de João Pereira. O luso comparecerá despois de vencer a Copa de Europa de Coimbra deste curso e cun currículo destacado, que inclúe un campionato e un subcampionato de Europa, o ouro nos Xogos do Mediterráneo e múltiples posicións de honra nas Series Mundiais. Aínda que non está no seu mellor estado de forma, a súa experiencia convérteo nun claro aspirante a pelexar polo podio.

O xaponés Uchida, o sueco Sandör, ou o especialista na natación Richard Varga son outros dos nomes que destacan nunha carreira na que as grandes seleccións mundiais aproveitarán para rodar aos seus futuros talentos. Por España, ademais de Serrat, comparecerán en escena Genís Grau e Sergio Baxter, vencedor na recente Copa de Europa de Holten, un dos homes de futuro en España. 

Anabel Knoll e Lisa Tersch son as principais candidatas ao ouro na categoría feminina

Na carreira feminina, Míriam Casillas intentará loitar polas prazas de podio contra un elenco de deportistas encabezado pola potente selección alemana, que acode sen Laura Lindemann, pero con representantes habituadas a ocupar prazas de top ten mundial. 

O dorsal número 1 da proba, Anabel Knoll, é unha das principais candidatas. Sétima en Yokohama, sexta en Leeds, oitava en Hamburgo, a xermana é unha deportista moi sólida, acreedora do número 1 da saída.

Enfronte, terá a Lisa Tersch, compañeira de selección, bronce en Hamburgo, na casa. Son as dúas principais favoritas a dominar unha carreira á que Inglaterra viaxa sen ningunha das súas mellores competidoras, pero coa emerxente Kate Waugh, duodécima en Hamburgo e parte do equipo inglés que venceu nas remudas mixtas da proba alemana.

Erika Ackerlund é a principal baza de Estados Unidos, mentres que Australia estará na liña de saída con Emma Jeffcoat, deportista afianzada xa  dentro da primeira liña internacional, sen a calidade para ocupar prazas de honra nas Series Mundiais, pero sí nas Copas do Mundo, nas que xa venceu en dúas ocasións. Francia contará con Dodet, Gautier e Conninx, sen Cassandre Beaugrand.

Ademais de Míriam Casillas, España terá a Anna Godoy, outras das asiduas das probas de máximo nivel, xunto a Marta Pintanel, Sofía Aguayo, Sara Guerrero e Noelia Juan. 

Como ocorre na proba masculina, será o momento para triatletas máis novas, en proceso de formación e crecemento. En total, serán 59 mulleres e 67 homes na liña de saída situada na plataforma da ponte dos Tirantes.