En Baltar, como na casa

A Sociedade Deportiva Portonovo é un dos grandes clubs do Concello de Sanxenxo. Á beira da praia de Baltar, nun campo que sobrevive á tiranía do céspede sintético, o club arlequinado dalle acocho a 120 nenos das súas categorías base e a un equipo sénior. Oito escadras das categorías base (iogurín, biberón, prebenxamín, benxamín, alevín, dous bloques cadetes e un xuvenil) dan vida á estrutura base do club, que foi fundado en 1948.

Para o ano cumpriranse as vodas de pratino dunha entidade que, máis alá de que nunca foi quen de lograr grandes fitos competitivos, sempre fixo parte da estrutura social da vila mariñeira, artellando o aspecto deportivo e lúdico. De tal maneira, sempre tivo un relevante respaldo social.

O crecemento e estabilidade deste clásico das Rías Baixas tradúcese na incorporación paulatina de máis rapazas. A integración da muller na entidade tamén se manifesta coa presenza de adestradoras no corpo técnico do club. Non se pode esquecer que á fronte da entidade está unha muller, a presidenta Montse Martínez.

As rapazas da localidade que o desexen poden incorporarse a comezar a dar as súas primeiras patadas ao balón co Portonovo.

Con adestradores titulados, o proceso complétase cando algún xogador do conxunto sénior acaba tomando as rendas dalgunha escadra da base, como ocorre con Iván, que leva un dos bloques de rapaces da institución.

O actual coordinador das categorías inferiores da SD Portonovo é Óscar Río, xogador cunha dilatada carreira no fútbol das Rías Baixas e mesmo do nacional, xa que militou no Pontevedra Club de Fútbol, Talavera ou Club Deportivo Ourense, entre outros. Despois recalaría no Céltiga e no CD Ribadumia, nos que desenvolveu os últimos anos da súa etapa como futbolista.

Río ten clara cal debe ser a liña que guíe ao Portonovo no seu día a día. "Nuestra filosofía pasa por enseñarles valores de disciplina, respeto, compañerismo y porque se diviertan. Y para eso es fundamental que jueguen todos siempre. Así lo hacemos. El resultado es completamente secundario para nosotros", explica o coordinador técnico do club.

O mellor exemplo de que ese proceder funciona en Baltar é o conxunto benxamín que o propio Río dirixe con orgullo, malia que os marcadores non lle son todo o favorables que lle gustaría. "No hemos ganado ningún partido, pero los diez jugadores que forman la plantilla vienen a todos los partidos. Eso quiere decir que disfrutan y que algo estaremos haciendo bien".

O club sobreviviu á pandemia con solvencia, grazas á posibilidade de competir no treito final da temporada pasada e á implicación dos pais, sen os que a boa marcha da actividade deportiva na base sería máis complicada.

Esa unión de forzas é a que permite que a entidade permaneza firme, que siga prolongando a súa traxectoria. Unha longa historia aséntao como parte do fútbol galego. Posúe unha boa imaxe e un método de captación no que o boca a boca entre os rapaces da zona ten un papel importante. O campus de verán que desenvolve fai o resto. Mesmo rapaces que nunca probaran a actividade con anterioridade nas súas vidas acaban véndose atraídos despois de pisaren o verde e gozar coas leccións, o contacto co balón e cos novos amigos.

O obxectivo do club é alimentar o fluxo de xogadores desde as categorías máis baixas ata chegar ás máis elevadas, e, se pode ser, finalizando o ciclo no primeiro conxunto, no sénior, que milita na Preferente e estivo pelexando esta temporada por retornar á Terceira División.

A mentalidade non muda e seguirá sendo esa. A filosofía e os valores deportivos continuarán, máis alá de que o bloque gañe, empate ou perda. O disfrute de todos e a unión máis alá das derrotas é o que vale. "Mientras siga estando aquí, seguirá siendo así. El día que me digan que eso deba cambiar, cogeré las maletas y me iré", aclara contundente Óscar Río a ese respecto.

Polo de agora parece que ao club non lle vai mal de todo con esa maneira de traballar e de ver o deporte.