Cada fin de semana é un reto diferente para o Club Cisne. O equipo pontevedrés intentará subir o penúltimo chanzo da esixencia esta fin de semana contra un dos bloques máis poderosos da División de Honor Prata, o San Pablo Burgos. A escadra lerezana principiou o curso con determinación e con triunfos. Dúas vitorias en dous duelos contra rivais duros e con marcadores axustados que poñen de manifesto algunhas circunstancias: o bo estado de forma do colectivo, a súa capacidade para xestionar o marcador en encontros equilibrados e, implicitamente, o elevado nivel da competición.
E o Burgos é a demostración palpable dese último factor. Despois de dúas xornadas contra adversarios incómodos, o cadro castelán eleva o nivel de complicación do obxectivo. A presenza do internacional estadounidense Álex Chan nas súas ringleiras pon de manifesto o potencial duns e outros. O xogador pontevedrés, formado no Cisne, no que viviu unha dilatada traxectoria que rematou a pasada campaña, foi á procura de novos horizontes e atopounos nun proxecto sólido e ambicioso, sustentado por un poderoso músculo financieiro. Aspectos contra os que o Cisne non pode pelexar.
Chan non é o único elemento de categoría que milita no rival castelán, nin o único veño coñecido da afección lerezana. Xa moito máis asentado no balonmán europeo, retorna ao pavillón o brasileiro Guilherme Linhares de Souza, que militou no Cisne na campaña 2017-18, cando aínda era un rapaz. E, por suposto, o arqueiro Jorge García Lloria, ex compoñente da SD Teucro durante moitos anos, dous elementos de garantías para a faceta de contención.
Regresan ao Municipal os excisneístas Chan e Linhares e o exteucrista Lloria
Pero, como tódolos proxectos renovados, e o San Pablo Burgos é un proxecto con moitos rostros novos, os inicios poden ser complexos. Neses estará o Cisne para intentar aproveitar as vantaxes da cohesión que ofrece o tempo.
Porque Jabato traballa cun bloque máis estable e homoxéneo, con menos modificacións (que algunhas tamén as hai) que o seu contrincante, e un estilo moito máis definido e estable ao longo dos anos, malia o troco do técnico do curso pasado ao anterior.
Iso si, non todo serán vantaxes. Un contratempo significativo é o do primeira liña Daniel Serrano, mancado nun nocello. Os demais xogadores están dispoñibles para o técnico.
O Cisne intentará ampliar a tres o seu pleno de triunfos contra un dos mellores planteis da competición. Ata agora caeron o Unión Financeira de Oviedo e o Novas no Rosal. Para o cadro de Roi Sánchez sería o segundo triunfo e o primeiro a domicilio, despois de caer no comezo ligueiro perante o Alarcos Ciudad Real e gañarlle na casa ao Barcelona B pola mínima. Sexa como sexa, e aínda que é balonmán, non se agarda outra cousa que non sexa un partido igualado.
