"Facédeo polas cores, polos seareiros"

PONTEVEDRA. Lupe Murillo esixiulle aos xogadores do Pontevedra un último esforzo na procura da permanencia na Segunda RFEF. A presidenta do Pontevedra Club de Fútbol non quixo prodigarse en declaracións no acto ao que asistiu onte no Pazo Provincial, onde foi recibida pola presidenta da Deputación, Carmela Silva, e o deputado de Deportes, Gorka Gómez, na súa liña de recoñecemento e homenaxe aos clubs máis representativos da provincia.

"Os que teñen que dalo todos son os xogadores", expresou a presidenta do conxunto granate no seu breve turno de palabra. "Polas cores, polos seareiros e por quen os trouxo aquí. Está nas súas mans", expuso a dirixente do club de Pasarón, que se recoñeceu afectada pola situación deportiva que está a atravesar o club, co primeiro equipo mergullado na batalla pola permanencia contra todo prognóstico.

Murillo aclarou que os resultados deportivos "non dependen de nós, dependen de eles e teñen que dalo todo de aquí ata o final da temporada", sentenciou.

"Non estou no mellor momento nin demasiado contenta", confirmou a dirixente granate, que non quixo facer valoracións profundas da temporada polo de agora e agardará ao remate da mesma para sacar conclusións. "A avaliación realizarémola ao remate da temporada. Agora o que debemos facer é poñer toda a ilusión nos sete partidos que faltan".

Murillo recibiu o afecto da presidenta da Deputación Provincial, Carmela Silva, nun acto no que houbo moitos guiños mutuos. "É moito máis doado que ti comprendas o que sentimos", espetoulle a dirixente do club granate á presidenta provincial, facendo mención aos vínculos co deporte de Silva, cuxo fillo, Iago Falque, é futbolista profesional.

Silva quixo poñer en valor ao Pontevedra no acto de recepción no que tamén participou o conselleiro responsable da área financieira do Pontevedra, Enrique Mariño. "Isto é un recoñecemento ao Pontevedra, á directiva, aos xogadores e á veciñanza. O Pontevedra escribe con letras de ouro o nome do fútbol", lembrou a dirixente provincial, que pediu unión para o treito final da campaña na pelexa polos obxectivos finais do cadro de Pasarón. "Todos temos que ser unha "piña"".

Silva lembrou, ademais, que o PCF "é un equipo especial, con alma. E os equipos que teñen alma non a perden".

A Deputación é o principal patrocinador do club de Pasarón, feito xustificado pola repercusión que lle ofrece á provincia. "Cantas persoas coñecen Pontevedra e as Rías Baixas grazas a que por primeira vez viñeron aquí para poder presenciar un partido do seu equipo en Pasarón?", preguntouse Silva.