sábado. 21.09.2019 |
El tiempo
sábado. 21.09.2019
El tiempo

Álex Fernández: "Fanme sentir coma un fillo"

Álex Fernández presionado por un xogador do Tenerife no triangular disputado en Pasarón. EMILIO MOLDES
Álex Fernández presionado por un xogador do Tenerife no triangular disputado en Pasarón. EMILIO MOLDES

▶ Álex Fernández recobra a ilusión da titularidade na Liga despois dun remate da temporada 2018-19 na que "parecía que me enterraban"

▶ O ourensán aspira a quitar a "dobre espiña cravada" da pasada campaña pola frustración do inteto fallido de play off e as súas lesións

A finais de maio, Álex Fernández atopábase na meirande parte das quinielas como inminente baixa do Pontevedra Club de Fútbol para a campaña 2019-20. "Parecía que me enterraban", lembra o centrocampista ourensán. Hoxe, a tres días do comezo do curso, apunta á titularidade do partido do sábado en Pasarón contra o Coruxo FC.

"Aquí sigo, e sigo porque o trato é excepcional, de dez. Oxalá poida estar os máis anos posibles, porque paga a pena de verdade. Desde o primeiro ano, desde o minuto un, o club e a afección fixéronme sentir coma un fillo", expresa o centrocampista, desexoso de esgotar xa o tempo de pretemporada. "Ao xogador gústalle que os partidos conten canto antes como tres puntos. Aínda que son curtas, as pretemporadas fanse eternas".

Álex Fernández: Ao xogador gústalle que os partidos conten canto antes como tres puntos. Son curtas, pero as pretemporadas fanse longas

Para Fernández o curso que comeza é un dobre reto despois da dobre desilusión do pasado recente. "Unha dobre espiña cravada, por non poder alcanzar o play-off co equipo e, no individual, por un ano moi afectado polas lesións. O míster estaba a confiar en min e tiven a lesión que me truncou todo o ano", apunta botando a mirada atrás.

Álex Fernández apunta á titularidade ante o Coruxo FC

O verán foi produtivo. Ou iso pensa o veterán futbolista granate. "Como o resto do equipo, fun de menos a máis. O Pontevedra está preparado. Hai cousas que apuntalar, como en tódolos conxuntos, pero iso conseguirase co paso dos partidos. A pretemporada foi enfocada para ir de menos a máis: ao final quedamos con vitorias e boas sensacións".

A afección tivo momentos de dúbidas pola imaxe ofrecida nos primeiros encontros de verán. O medio centro granate é comprensivo. "Enténdoos perfectamente. Ao afeccionado o que lle gusta é ver gañar ao seu equipo, desde o minuto un, non só en partidos oficiais . E ás veces escápanlle detalles sobre a carga de traballo dos xogadores".

E é que, lembra, o obxectivo do verán é chegar nun momento adecuado para afrontar o primero encontro. "O Real Madrid fixo unha pretemporada moi mala e chegou á primeira xornada de Liga e meteulle tres ao Celta na casa. O espectador do Madrid xa non lembrará os partidos que perdeu o equipo en Estados Unidos", comenta achegando un bo exemplo.

Álex Fernández: O Real Madrid meteulle tres ao Celta no primeiro partido de Liga e xa ninguén lembra as derrotas en Estados Unidos

Iso si, ata agora foron o ruxe ruxe e as dúbidas. Coa chegada do Coruxo, comeza a esixencia de verdade. A presión, para o bo e para o malo, de Pasarón. "Aínda que fixésemos unha pretemporada excepcional, se non empezamos ben, despois imos ter que ir a remolque. Acadar os tres puntos contra o Coruxo é fundamental para o obxectivo".

E aínda que non se atreve a dicir a palabra ascenso, sabe que ese é o camiño que marca Lupe Murillo. "A presidenta deixouno claro: o equipo vai intentar acadar os tres puntos en cada partido".

Para aspirar a todo, o PCF debe crecer a domicilio. "Estamos a traballar a nivel mental e táctico. O corpo técnico está a incidir en como mellorar fóra da casa, que foi o que nos condicionou a temporada pasada. Este equipo pode tratar de ti a calquera e máis nesta categoría, na que está demostrado que non hai grandes diferenzas".

Álex Fernández: "Fanme sentir coma un fillo"
Comentarios