Javier Gómez Noya non poderá participar no Campionato do Mundo de Ironman que se disputará en ST George. O ferrolán de Pontevedra confirmou este xoves que deu positivo, o que lle impedirá estar en disposición de participar na proba, que se levará a cabo no estado estadounidense de Utah, na localidade de ST George, o sábado 7 de maio.
Gómez Noya fixo oficial a nova a través da súa conta de Instagram. "Hoxe xa debería de estar en St George: ese era o meu plan. En cambio, a realidade é ben distinta, xa que agora mesmo estou en cama, con covid. Conseguín esquivar o virus durante dous anos, pero finalmente golpeoume nun momento bastante inoportuno. Malia ter a pauta de vacinación completa, estame a dar bastante forte, con febre, dor de gorxa, cabeza, muscular...".
"Agora mesmo estou en cama, con covid. Malia ter a pauta de vacinación completa, estame a dar ben forte"
"Así que nesta situación creo que non sería nin realista nin responsable competir en dúas semanas nun Campionato do Mundo de Ironman. É algo moi duro, porque levaba moitos meses preparando a carreira, fóra de casa, adestrando moito e sorprendido co meu rendemento, desexando mostrar a miña mellor versión na longa distancia".
"Desafortunadamente, iso vai ter que esperar. Agora a miña prioridade é recuperarme totalmente e procurar novos obxectivos. Temos outro mundial en outubro e agardo poder competir en outro ironman potente este verán", explicou o campión mundial.