O Pontevedra mantén silencio absoluto ao respecto do futuro. A presidenta da entidade, Lupe Murillo, continuou este luns coa primeira rolda de diálogos cos xogadores do primeiro plantel granate de cara á organización do equipo do próximo curso.
Pasaron polas oficinas do club os futbolistas con residencia na cidade ou na zona, despois de que a meirande parte dos membros do colectivo que proceden de fóra da provincia fosen desfilando pola sede da entidade a semana pasada. Na súa saída da reunión que mantiveron co director deportivo granate, Roberto Feáns, e coa presidenta, Lupe Murillo, que leva o peso das negociacións, a resposta foi sempre a mesma: "Non estamos autorizados para falar. O club explicou que informará mediante un comunicado".
Calquera comentario verquido á prensa ao respecto dos contidos dos diálogos podería poñer en perigo a permanencia dos deportistas no conxunto, polo que todos eles respectaron a confidencialidade requerida polo consello de administración.
A meirande parte dos membros do colectivo están polo labor de continuar no conxunto, aínda que en case tódolos casos existen algúns condicionantes.
A entidade fai fincapé nun aspecto á hora de facer a súa aposta polos deportistas: o desexo que demostren de continuar vencellados ao PCF. Desde que Lupe Murillo está á fronte do club, ese é un valor que o Pontevedra ten en consideración á hora da toma de decisións: o compromiso e o esforzo dos xogadores por seguir lucindo a elástica granate.
Entre as inquedanzas dos profesionais atópase o nome do adestrador que estará ao mando das operacións na próxima campaña. Nese senso, Luismi segue a ser a primeira opción da entidade de Pasarón. E aínda que o paso dos días incrementa as dúbidas e os rumores ao respecto da situación, o técnico segue a estar ben colocado para continuar no banco.
Desde o exterior e as redes sociais xa se vencellaron varios nomes de adestradores a Pasarón, aínda que o club nega calquera contacto directo con outro preparador que non sexa Luismi.
Outro aspecto que teñen en consideración os futbolistas é o factor económico, non só polo diñeiro en si mesmo, senón porque ven nos seus emolumentos a importancia que o club lles concede con respecto a outros compañeiros.
Algúns xogadores non comprenden que o seu bo rendemento durante o exercicio non se traduza no seu contrato.
O proxecto deportivo é outro elemento que teñen en conta: o feito de xogar nun club ambicioso, con nome, cunha afección numerosa e nun estadio como Pasarón resulta atractivo para eles. O crecemento dos últimos anos, que se viu freado nesta campaña, tamén chama a atención.
A mellora no aspecto económico do club e, sobre todo, en canto a liquidez, axudoulle a captar a moitos xogadores interesantes nos últimos tempos. O Pontevedra pasou de vivir temporadas con atrasos nos pagamentos a cumprir regularmente no abono das nóminas aos seus asalariados.
Ese factor, sumado a outros aspectos como a calidade de vida na cidade do Lérez, a afección, a historia do club, etc., axudou a que a meirande parte dos compoñentes do pasado exercicio amosasen a súa intención de permanecer no equipo granate no curso 2018-19.
O diferenza doutras temporadas, nas que o PCF intentou pechar canto antes as negociacións cos xogadores e as fichaxes (ao comezo da pasada pretemporada só faltaban por chegar Iván Martín e Berrocal), no curso actual os xestores están a tomar con reflexión e calma as negociacións de cara ao futuro. Dez días despois do remate da curso aínda non comunicaron os nomes dos deportistas que desexan manter en nómina e aqueles dos que van prescindir.