O Pontevedra perdera contra o San Sebastián de los Reyes e era décimo primeiro, con 17 puntos, a nove do liderado e seis da cuarta praza, que dá dereito a disputar a promoción de ascenso. Catro semanas despois, o equipo granate igualou a puntos co terceiro e cuarto clasificados, o Real Madrid Castilla e a Cultural Leonesa, e está a catro puntos do liderado. A traxectoria do conxunto que prepara Luismi nas últimas semanas e a irregularidade demostrada polos grandes favoritos a disputar a promoción permitiulle recurtar puntos con todos eles. Os 29 puntos que ten neste momento permítenlle ser optimista na pelexa polos postos nobres da clasificación.
O Pontevedra está a aproveitar o seu calendario como local para facerse forte. Dos últimos catro duelos, tres foron en Pasarón, aos que haberá que sumar os dous consecutivos que afrontará coincidindo co final da primeira volta e o comezo da segunda. Nesa fase do torneo, todos pincharon. Tamén a Ponferradina.
O líder sumou sete dos últimos doce puntos polos que competiu. Perdeu contra o Navalcarnero (1-0) en Madrid na décimo cuarta xornada, e despois de dúas vitorias seguidas, empatou o domingo perante o Celta B no Toralín. Como non é o único bloque irregular dos de arriba, eses puntos perdidos non lle impiden estar no primeiro posto en solitario.
O principal damnificado foi o San Sebastián de los Reyes, que perdeu os catro últimos envites
E é que o Fuenlabrada, que parecía o máis regular dos últimos dous meses e medio, sufriu un par de reveses inesperados nos últimos tempos. Na mesma etapa na que o PCF gañou os catro envites, os madrileños acumularon cinco puntos: unha vitoria e dous empates. Perderon contra o Celta B en Barreiro hai dúas xornadas, poñendo fin a unha serie de oito xornadas sen caer, empataron antes co Valladolid B a domicilio e a fin de semana pasada tampouco puideron co Unión Adarve en Madrid. É dicir, cinco de doce.
O caso do Real Madrid Castilla tampouco é mellor. O filial venceu dous e perdeu dous duelos dos catro últimos. Gañou na casa, pero foi superado a domicilio, contra o Deportivo Fabril e o Coruxo, en dous duelos nos que se puxo por diante.
A Cultural Leonesa, que este luns destituíu a Víctor Cea, empatou contra o Burgos na casa, perdeu fronte ao Salamanca CF UDS e gañou pola mínima, con dificultades, ao Guijuelo e ao Deportivo Fabril no desconto.
Con todo, o principal damnificado foi o San Sebastián de los Reyes, que perdeu os catro últimos envites. Desde que gañou contra o Pontevedra, non levantou cabeza: superárono o Las Palmas, o Atlético B, o Castilla e o Unionistas.
