Durante anos, a Ferrari cimentou as súas esperanzas de éxito nas probas do túnel do vento. Botaban contas durante o inverno e crían en Maranello que os seus bólidos ían ser os máis veloces. E despois, fracaso tras fracaso.
Sen pretender frustrar as ilusións da ciencia automobilística, a realidade é que a temporada comezaba despois da primeira bandeira verde. Todo o de antes só eran preparativos para a voda.
Este sábado é cando a EBA baixa a bandeira verde para o Mundioma Marín Ence Peixegalego. Ata agora, só foi a pretemporada. E non é que a preparación estea baleira, nin que careza de utilidade e sentido. Pero non suma. É un ingrediente sen valor nutritivo: un medio, nunca un fin.
Agora si, a partir das 20:00 horas deste sábado, na Raña, todo conta. O primeiro, o partido contra o Zamora Caja Rural, un debutante na categoría contra o que Javier Llorente quere as confianzas xustas.
O bloque zamorano está composto por unha gran dose de canteiráns e mozos sen moita experiencia na categoría. Todo iso convérteo nunha grande incógnita a despexar.
Javi Domínguez podería disputar o seu último partido coa camisola do equipo marinense
Pola súa banda, a escadra de Llorente chega á cita -e ao comezo do curso- con algunhas caras novas con respecto ao ano anterior.
Seguen cinco homes da campaña pasada no colectivo, todos cun rol destacado.
Para a escadra marinense, que ten a dúbida do futuro a curto prazo de Javi Domínguez (o ala pívot podería abandonar a disciplina do colectivo por motivos persoais), será unha proba para medir os seus progresos durante o verán, o nivel de acoplamento e de eficiencia de adestramento.
E será un aspecto relevante tendo en consideración que o valor do campionato de grupo é dobre (clasifica de forma automática para o play-off polo ascenso) e que só tres conxuntos poden pelexar polo salto de categoría ao remate do curso.
E vendo as cifras de derrotas coas que os conxuntos chegaron no pasado curso ás prefases de ascenso, é moi importante ter presente que a marxe de erro para os aspirantes é ben escasa.
