O Marín Peixegalego quere esquecer o final do partido da semana pasada. O final do partido e o resultado. Unha derrota dorosa provocada por unha controvertida decisión arbitral que deixou sen resposta ao bloque de Javier Llorente nos últimos segundos do choque contra o Círculo de Gijón, rival directo na pelexa por unha praza de play-off.
O desenlace non enturbia a rehabilitación do colectivo da Raña, que regresou do parón de Nadal fóra de tono para apañar unha inesperada derrota na casa contra o Ávila, pero recuperou sensacións gañando con autoridade en Carballo e confirmou esa mellora nun duelo de poder a poder fronte a un adversario de grandes dimensións, malia o marcador final.
O bloque da Raña non quere complicacións este sábado (20.00 horas), diante da súa xente. O pechacancelas, Covadonga de Oviedo, non se presume o rival máis feroz, xa que leva 14 derrotas en outras tantas xornadas. Pero sempre hai unha primeira vez para todo. E o Peixegalego non ten intención de ser esa primeira vez.
Javier Llorente podería ter que dar descanso forzoso a Kevin van Wijk, que sufriu unha escordadura de nocello no enfrontamento da semana pasada en Xixón, onde volveu ser o mellor do equipo. Haberá máis responsabilidade para os demais compañeiros, que deberán facerse fortes baixo os aros en ausencia do neerlandés.
Se é quen de ser fiel ao seu mellor nivel defensivo e alcanza o ritmo de xogo e intensidade das últimas citas, o Mundioma Peixegalego debería comezar o seu longo periplo como local de catro semanas cun triunfo restaurador.
