Por primeira vez na historia da Segunda División B, os clubs participantes da categoría teñen que andar pendentes do que ocorre en outro grupo para ter máis claro o seu destino.
De rematar a Liga neste momento, o Pontevedra disputaría a liguiña clasificatoria para o play-off de ascenso a Segunda, pero sería o último clasificado dos seis que formarían o grupo da segunda fase, debido aos seus trece puntos. Sería unha situación que asinaría, seguramente, o corpo técnico e directivo do club granate ao comezo do curso, pero que pon de manifesto que a competición ten aberta frontes no presente que afectan ao futuro.
A igualdade foi a máxima neste comezo de campionato, no que o PCF é o terceiro en discordia do grupo 1-A. Os granates teñen dous puntos menos que o Deportivo e catro menos que Unionistas, o sorprendendente mellor equipo da suma dos dous subgrupos.
Se a igualdade é moi grande no sector dos conxuntos galegos e salmantinos, moito máis o é no de asturianos e demais casteláns-leoneses. Ata tres escadras están empatadas a 14 puntos nos postos elevados da táboa: O Valladolid B, o Langreo e o Burgos.
Dada a marxe tan breve de tempo da que dispoñen os equipos para conseguir os resultados, as diferenzas vense reducidas á mínima expresión e a tensión viuse incrementada.
Non vai haber apenas tempo para realizar unha criba nas 18 xornadas das que se compón a primeira fase. Así se demostra polo momento no subgrupo 1-B, no que só dous puntos separan ao propio Pontevedra, terceiro, do Celta B, sétimo. Un partido distánciaos, pero se agora comezase a segunda fase, os celestes xogarían por evitar o descenso a Terceira e os granates polo ascenso a Segunda.
Nese grupo atópanse o Racing de Ferrol (12), o Zamora (12) e o Compostela (11). Por debaixo, coa obriga de remontar, están o Coruxo (7), o Guijuelo (6) e o Salamanca CF UDS (3). Dada a gran cantidade de equipos que descenden, teñen un duro traballo por diante para obter a salvación.
GRUPO 1-B. No grupo 1-B, as diferenzas son mesmo menores. O liderado e a zona de descenso están distanciadas por un só partido. Os 14 puntos dos tres de cabeza non lles conceden osíxeno perante a Cultural Leonesa (13), o Lealtad (13), o Numancia (12) ou mesmo o Oviedo B (11).
O Covadonga (6), o Sporting B (6) e o Marino de Luanco (5), teñen traballo por diante para intentar eludir as últimas catro prazas e, se non o logran, para sumar a meirande cantidade posible de puntos para ter opcións reais de permanencia na liguiña da segunda fase.
Quédanlles 10 xornadas a tódolos equipos para saber se conseguen os primeiros ascensos do ano á Segunda B Pro (oficialmente Primeira División RFEF) ou se deberán loitar por evitar caer á Terceira División RFEF. E se a Terceira actual é un pozo, imaxinen o que será a nova.