Pontevedra acolle a II Copa de España de Sprint Olímpico de Embarcacións Múltiples en categorías Sénior e Xuvenil masculino e feminino a próxima fin de semana.
O evento desenvolverase entre a mañá do sábado e o domingo no Complexo Deportivo David Cal de Verducido (O Pontillón) e contará coa participación de 700 padexeiros e padexeiras procedentes de toda Galicia (250), Andalucía (104), Madrid (60), Asturias (55), Baleares (45), Estremadura (27), Castela e León (23), País Vasco (18), Cataluña (17), Valencia (9), Castela A Mancha (8), Ceuta (6), Navarra (2) e Aragón (1).
Os que se acheguen ata as instalacións de Verducido poderán gozar co espectáculo dos K-2, K-4, C-2, C-4 e Paracanoe de 63 clubs nacionais, que competirán en 1.000, 500 e 200 metros. As series clasificatorias de contrarreloxo terán lugar durante toda a mañá do sábado 7, entre as 9:00 e as 13:30 horas, celebrándose as semifinais pola tarde, entre as 16:00 e as 20:00 horas, e as finais o domingo á mañá.
Esta II Copa de España de Sprint Olímpico foi presentada este mércores nun acto no que participaron o presidente da FGP, Alfredo Bea, e o tenente de alcalde e concelleiro de Deportes, Tino Fernández, quen lembrou que "o piragüismo é un referente en Pontevedra" e que este campionato afianza aínda máis o seu posicionamento "como capital deste deporte en Galicia e, neste caso, de España" e como cidade organizadora "de eventos de alto nivel".
"Hai pouco tivemos a Copa de España de Sprint de embarcacións individuais, que foi un éxito tanto a nivel de participación como de resultados, cunha concentración de medallistas olímpicas que non se dera nunca na historia da cidade, e agora volvemos ter aquí aos mellores de España», asegurou Fernández.
