A importancia da parella de dianteiros do Pontevedra no rendemento do colectivo estase a demostrar capital. A separación dos dous atacantes granates volveuse un grave inconveniente para o conxunto que dirixe Jesús Ramos. Así, polo menos, o reflicten os resultados do colectivo que prepara.
O Pontevedra leva preto de 300 minutos sen facer un gol na Liga. O último en conseguilo foi precisamente Rufo, no encontro contra o Deportivo da Coruña en Pasarón, na penúltima xornada da primeira volta. Desde aquel momento, o bloque da cidade do Lérez vive unha seca que se traduce na peor xeira de resultados desde que Jesús Ramos ocupa o banco de Pasarón.
A diana que materializou Rufo fronte aos coruñeses foi no minuto 69. Desde entón, nin nos 21 minutos restantes daquela cita, nin nos tres enfrontamentos seguintes, o once de Pasarón foi quen de marcar. En total 291 minutos sen atopar porta e tres derrotas consecutivas que poñen en risco os obxectivos do equipo de Pasarón desta temporada, dada a escaseza de tempo e marxe de erro que ofrece o novo sistema de competición.
A oposición dos datos coa Rufles sobre o céspede e sen ela é abrumadora. Coa parella na mesma aliñación, os granates non perderon partido e marcaron sempre, excepto contra o Zamora e o Cádiz na Liga. Sen un dos dous elementos, sempre se produciu derrota dos lerezanos e ademais non houbo gol que servise para paliar os danos.
A ruptura da parella produciuse o día que Charles foi expulsado por darlle unha palmada na caluga a un adversario, durante a tangana producida pola expulsión de Lara por propinarlle un empurrón a Rufo.
O caso é que desde aquela unha maldición persegue aos dous atacantes, que non acaban de coincidir en Liga. Charles perdeu dous partidos do torneo: en Coruxo e en Pasarón contra o Racing de Ferrol. Rufo quedou coma unha illa no medio do océano. Desasistido e en inferioridade ante as defensas rivais. Pasou desapacercibido nos dous enfrontamentos e tivo a mala fortuna de mancarse no ombreiro no choque contra o Racing de Ferrol.
Precisamente ao partido seguinte Charles retornaba da sanción, pero Rufo non estaba sobre o céspede para ocuparse da defensa de Unionistas. Tivo como parella de baile ao incipiente Martín Diz. E deberá bailar con el e con outros acompañantes un par de semanas máis, cando menos, xa que Rufo ten para tres semanas de rehabilitación.
Un panorama nada agradable para o colectivo, que cando se produciu a separación da Rufles, ocupaba as tres primeiras prazas da clasificación xunto co Deportivo e Unionistas. Agora, está mergullado nos postos de loita pola permanencia, aínda que cun partido menos que os seus adversarios.
Con eles xuntos, o Pontevedra gañara tres partidos e empatara catro. Sumaba 13 puntos. Marcara 11 goles e encaixara sete. Desde entón, non volveu sumar nin a marcar e recibiu seis dianas. Na Copa do Rei, ademais, bateu ao Cartagena (2-1) e levou ao Cádiz ata a quenda de penaltis.
