A remonta do Pontevedra contra o Tudelano cobroulle a súa peaxe ao equipo granate.
Dani Portela marchou do partido mancado con molestias nun xeonllo. Os servizos médicos do Pontevedra realizáronlle unha resonancia na xornada do luns para determinar o alcance da lesión. O central padece un pinzamento cunha pequena rotura no corno anterior do menisco.
O xogador perderá con absoluta seguridade o partido do próximo domingo (18.00 horas), no que o cadro pontevedrés se enfrontará á Sociedad Deportiva Ponferradina. A evolución semanal do futbolista determinará o plan da súa recuperación e permitirá definir se poderá xogar ou non en seguintes partidos.
Non será a única ausencia no equipo titular de Luisito. O teense non poderá contar co concurso de Kevin Presa, que deberá cumprir un partido de suspensión debido a que viu a quinta amoestación do seu segundo ciclo sancionador.
Tampouco estará dispoñible, aínda, Iker Alegre, que espera poder ter a alta médica nun curto período de tempo para poder volver aos terreos de xogo.
A incógnita de cara ao envite dominical será Mario Barco, que podería regresar tras dúas semanas ausente por lesión.
Luisito recuperará aos sancionados contra o Tudelano Javier Bonilla e Miguel Loureiro.