domingo. 08.12.2019 |
El tiempo
domingo. 08.12.2019
El tiempo

O primeiro exame de Pasarón

Romay, presionado por Sana N'Diaye nun adestramento. JOSÉ LUIZ OUBIÑA
Romay, presionado por Sana N'Diaye nun adestramento. JOSÉ LUIZ OUBIÑA
O Pontevedra busca o triunfo contra un dos favoritos a disputar a fase de ascenso, o Atlético Baleares

A dualidade entre todo o bo que ocorre en Pasarón e todo o malo que sucede lonxe de alí acabará escachando algún día. Será daquela cando se comece a comprobar se o Pontevedra Club de Fútbol terá posibilidades reais de chegar máis arriba ou se se mete en leas dun pasado non tan remoto.

O cadro granate e a súa xente agardan que a balanza non se desequilibre este domingo á mañá no encontro fronte ao Atlético Baleares. A escadra que prepara Manix Mandiola é unha das candidatas a ocupar os catro primeiros lugares da táboa. Supera amplamente en orzamento ao Pontevedra, o curso pasado foi campión do sempre esixente grupo III e quedou moi preto de ascender a Segunda División. Nesta campaña arrancou con tres triunfos en cuatro partidos, a pesar da importante reconstrución que sufriu. O seu adestrador é o que posúe o mellor curriculum do grupo I. En resumo, non será un invitado agradable á sesión do vermut.

O Pontevedra, por agora, tamén foi un mal anfitrión para os seus visitantes. O once pontevedrés conserva a estabilidade aferrado aós seus dous triunfos como local, nos que usou diferentes argumentos. Pero iso contrasta coa pobreza que exhibiu no seu partido contra o Ibiza, no que a súa mala primeira parte espertou algunhas dúbidas, acrecentadas ao considerar o obxectivo que propuxo desde o primeiro día a presidenta, Lupe Murillo: o ascenso.

Incrustado en media táboa con seis puntos, o once de Luismi intentará volver a colocarse no medio do grupo de cabeza. E para iso terá que adaptarse a dúas novas circunstancias: a hora e o tempo. Pasarón acollerá fútbol a mediodía por primeira vez nesta campaña. O duelo comezará ás doce. A esa hora está previsto que chova sobre a capital. O estado do céspede e a súa evolución serán un misterio, porque serán as primeiras precipitacións do ano. Pero, cando menos, os protagonistas librarán da calor abafante das citas anteriores.

Luismi recupera a case tódalas súas pezas para o enfrontamento. Ten a única dúbida de Nacho López, que segue con molestias musculares, pero contará xa con Alberto Campillo, tras cumprir a súa sanción, e con Romay, Javi López e Adighibe, os tres xa recuperados dos seus problemas físicos de semanas precedentes. Tódolos elementos serán necesarios para superar o ruxe ruxe da bancada e medirse a un dos claros favoritos ao play-off.

O primeiro exame de Pasarón
Comentarios