A Feira da Saúde e o Benestar volve á Boa Vila na fin de semana do 20 ao 22 de maio. Agardase que esta edición, organizada pola Concellería de Deportes en colaboración coa Deputación, acade cifras récord de participación.
O programa está orientado a combater os efectos da pandemia no noso estado de ánimo e a optimizar a nosa saúde mental e benestar emocional, e contará desta volta con máis de 40 entidades expositoras vencelladas a asociacións socio sanitarias. Estas terán ocasión de visibilizar o seu traballo e desenvolverán obradoiros, charlas e clases varias.
Desta volta preséntase unha oferta moi ampla de actividades vencelladas ao exercicio físico, xa que a iniciativa pretende ser un espazo aberto e accesible para todos os públicos. Entre estas inclúense algunhas tan diversas como fútbol pé, dancehall, papiroflexia, un campeonato de petanca ou unha andaina solidaria.
No tocante á información e asesoramento sobre saúde mental haberá varios puntos como o da psicóloga sanitaria Marta Boquete, da Asociación Alba e diversos coloquios como o de Nieves Fernández, voluntaria de Cruz Vermella ou o relatorio participativo Na procura dunha boa saúde mental, orientado a fomentar estilos de vida saudables de cara a unha mellor saúde mental e protagonizado pola psicóloga clínica Montse García.
Desta volta os actos levaranse a cabo en dúas carpas: unha que estará situada na Praza de España e outra que se ubicará en Montero Ríos. As entradas serán de balde e o horario será partido venres e sábado, de 11.00 a 14.30 horas e de 17.00 a 20.30 horas, e todo seguido o domingo, de 10.00 a 14.00 horas.
O edil Tino Fernández quixo facer fincapé na consolidación desta iniciativa como "a feira máis importante de Galicia que se celebra neste eido das entidades socio sanitarias sen ánimo de lucro".