Hugo Casañas Pedrares converteuse o domingo á mañá no novo plusmarquista nacional de lanzamento de disco en categoría sub-16. O atleta do Rías Baixas fixo un mellor disparo de 64,10 metros no concurso que desenvolveu nas pistas de Balaídos, o que lle serviu para esnaquizar o anterior rexistro, que estaba en poder de Marcos Moreno desde 2018, cunha tentativa de 62,92. Casañas meteulle máis de un metro de vantaxe ao tope previo e mellorou en preto de dous metros a súa marca (62,29).
Ademais, a promesa do atletismo galego pasa a liderar o ranking mundial do ano do seu grupo de idade con esa metraxe. E faino no treito final do seu primeiro ano pertencendo á categoría sub-16. É dicir, ten por diante todo un ano máis dentro da súa actual categoría para proseguir coa súa mellora.
A evolución de Hugo Casañas está a ser notable desde que principiou a competir, sempre baixo a titela de seu pai e adestrador, Frank Casañas, responsable de lanzamentos do Centro Galego de Tecnificación Deportiva. Cabe lembrar que tanto el como súa muller, Dolores Pedrares, foron lanzadores de elite internacional.
O concurso do competidor do Rías Baixas foi de menos a máis. Principiou con dúbidas ao realizar un lanzamento nulo. Foi entrando en calor cun segundo intento que aínda estaba lonxe das súas mellores prestacións (52,55).
Na súa terceira quenda superou por primeira vez os 60 metros: 61,53. Xa estaba máis próximo ao seu tope persoal ata ese momento e comezaba a carburar. Un cuarto tiro de 57,31 antecedeu o récord de España de 64,10. Para pechar, o atleta do Rías Baixas enviou o disco aos 56,57.
Campión de España da modalidade con moita autoridade e medallista tamén en lanzamento de peso, o pequeno da saga Casañas Pedrares consolídase como unha das máis grandes promesas do atletismo cadete español.
A súa progresión desde a categoría sub-14 é notable. Xa daquela dominaba tanto en disco como en peso no seu grupo de idade e vencía no seu triatlón do Campionato de España.
Enfocado nos últimos meses esencialmente na disciplina que máis lle apaixona e domina, presume de títulos nacionais e de plusmarca hispana. Ademais, obtivo para Galicia a vitoria no Campionato de España por autonomías, sempre cunha autoridade incontestable.
O competidor do Atletismo Rías Baixas posúe igualmente a prata nacional en lanzamento de peso.
No alborexar dunha nova temporada, o competidor lerezano non detén a súa enorme progresión, froito dunha forza descomunal, unha gran calidade de adestramento e unhas cualidades técnicas envexables.
