Sergio Baxter e Antonio Serrat lograron un dobrete para España na proba masculina da Copa do Mundo de Triatlón que se disputou este domingo en Pontevedra.
O pelotón masculino non permitiu que a carreira tolease, como si o fixeron horas antes as triatletas. Baxter foi o mellor dun trío cabeceiro que acabou desbrozando o camiño ata xogar o triunfo na última volta a pé. Superou a Antonio Serrat e ao suízo Max Studer, que pechou o podio: os tres aparecían dentro das quinielas para a consecución do título e os tres cumpriron co seu papel, coa pequena desilusión para o propio Serrat, que se laiaba ao chegar á meta no segundo posto.
Na auga, o grupo non rachou en mil anacos. As diferenzas que se produciron non foron moi grandes. Na volta longa ao río, o francés Morlec e o portugués Silva marcaban o ritmo. Un regueiro de triatletas retornaban á plataforma de saída para principiar a segunda volta, a máis curta. Serrat pasaba lonxe das primeiras posicións.
O vigués reaccionaba sensiblemente durante a segunda volta para evitar unha fenda que lle obrigase a correr a contrapé despois da primeira transición. Con Morlec, Harley e Schomburg na cabeza, os deportistas saíron da auga sen grandes distancias e pronto se formou un numeroso pelotón de 34 unidades, no que se atopaba Serrat e o marroquí Jawad Abdelmoula, pero no que non estaban Sergio Baxter nin Max Studer, que no primeiro paso polo CGTD perdían preto de medio minuto.
Sen embargo, a falta de entendemento por diante e a determinación na persecución permitiu que tanto o murciano como o helvético entrasen no grupo principal xunto a outros oito corredores.
Serrat intentou sorprender na terceira volta cun ataque que non foi a ningures pola vixiancia exercida cara ao vigués de Pontevedra. O máis salientable da bicicleta foi a caída do marroquí Abdelmoula, que non puido rematar a proba, despois de demostrar as súas magníficas condicións na carreira das Series Mundiais de Hamburgo, onde subiu ao podio.
O marroquí Abdelmoula, favorito ao triunfo final, non puido rematar a proba por unha caída
No cambio aos tenis de carreira, Studer colleu o mando da proba e marcou un ritmo selectivo que foi descolgando a rivais, ata deixalo a soas con Serrat na zona do Mercado, na rúa Sierra. Pouco despois se lles sumou Baxter, peor colocado. Por detrás, o inglés Izzan Barclay e o luso João Pereira parecían as únicas ameazas para o estatus dos tres homes do podio. Un grupo cun trío de alemáns e o tamén español Grau parecía xa descartado para os metais.
As diferenzas cos demais ían crecendo, con Serrat e Baxter buscando a cabeza puntualmente e Studer pretendendo algún cambio de ritmo no descenso da terceira volta por Don Gonzalo e César Boente. Sen éxito para el, todo quedou para o último xiro. E subindo por Pasantería por última vez, Baxter arrancou coma un lóstrego, reventou a Studer e malia o seu esforzo por seguilo, Serrat tamén cedeu. O murciano chegou cuns metros en solitario á meta, por diante do vigués de Pontevedra e do helvético, que pechou o podio da carreira.
Kurikova reina no medio da tolemia colectiva
A checa Petra Kurikova foi a triunfadora da categoría feminina cun tempo de 1:57.43, nunha proba marcada polos trocos de posicións e polo ataque desde o treito de natación dun selecto grupo de seis deportistas. Unha das principais favoritas, a xermana Lisa Tertsch, rematou no segundo posto despois dunha prodixiosa remonta na que lle sobrou a última volta do treito a pé.
As británicas Alden e Waugh, a belga Vermeuylen, a alemana Meißner, a francesa Gautier e a ucraína Kyryk afastaron as demais nunha primeira volta de natación sen contemplacións. Na T1 metéronlle 20 segundos a un trío no que estaba a española Anna Godoy e máis de 40 ás favoritas.
A ucraína quedaba atrás e deixaba o grupo de cabeza en cinco. Por detrás, formábanse dous pelotóns numerosos. A dorsal número 1, Anabel Knoll, estaba no primeiro deles, no que tamén se incrustaba a gañadora final. Uns segundos máis atrás, Tertsch non racaneaba no esforzo ata cazar o primeiro grupo perseguidor.
Noelia Juan foi a mellor española na competición feminina ao rematar no sexto lugar
As diferenzas entre as cinco á fronte incrementáronse sobre o numeroso bloque perseguidor, ata chegaren á T2 con case un minuto de renda. Mentres o quinteto de cabeza se mantiña máis ou menos unido, con Vermeylen a uns metros, Tertsch arrancaba a moto por detrás e deixaba atrás a tódalas súas compañeiras de viaxe. En dúas voltas, a xermana capturaba o quinteto cabeceiro e deixábao atrás. Corría cara o que parecía un triunfo seguro. Pero Kurikova chegaba forte desde atrás, recollendo cadáveres. Foi constante no esforzo e mediu mellor o seu gasto e no último paso pola Michelena cazou e deixou atrás á prometedora teutona para levar o ouro. Prata para Tertsch e bronce para a francesa Sandra Dodet.
A mellor española foi Noelia Juan, que finalizou sexta, mentres que Míriam Casillas tivo que retirarse despois de sufrir unha caída na saída da auga.