Todo queda na casa

O Pontevedra gasta as últimas balas na pelexa pola promoción de ascenso. O equipo granate aproveita a mellora do tempo e do estado do céspede de Pasarón para volver exercitarse sobre o seu rectángulo de xogo.

"Todo o que sexa que poidamos adestrar aquí favorece o noso traballo", recoñece Luismi, que agardou pacientemente pola chegada da primavera para ter libre a oficina. Pasarón xa se recuperou do castigo do inverno, das chuvias, das baixas temperaturas e da falta de luz solar.

"Supón moito para nós. Cada quince días xogamos neste campo. Non é o mesmo disputar os partidos nun terreo de xogo sintético que facelo nun de herba natural. Por circunstancias non podiamos adestrar aquí, ata agora, pero o tempo que estamos a ter vainos permitir facelo un día máis á semana", anunciou o preparador vigués do cadro granate.

Os adestradores do Pontevedra dos últimos tempos diferéncianse en moitas cousas: no discurso, no estilo de xogo, no carácter... No único que se parecen todos é na conciencia da importancia de exercitarse no mesmo lugar no que se compite as fins de semana. E máis cando a alternativa é unha superficie diferente. "Non ten nada que ver pisar sobre herba natural e sobre artificial. Os xogadores nótano. Non se parece en nada".

O Pontevedra retorna ao seu fogar antes de afrontar un mes no que non sairá de Galicia. Disputará os seus dous enfrontamentos como visitante en Vigo e A Coruña. Ata para iso todo queda na casa. Os resultados que obtivo o once de Pasarón nos seus anteriores desprazamentos pola comunidade autónoma fanlle concibir esperanzas a Luismi.

"Cando fomos a Vigo foinos ben. Agardamos que xogar por aquí preto nos valla para sumar puntos, para facer bos os partidos e que poidamos manternos preto dos postos de arriba. Quedan menos xornadas e non se pode fallar. Canto máis erres, máis vidas estás perdendo para poder meterte na loita polo play-off. Somos conscientes diso".

Desde o punto de vista dos hábitos e tamén para permitir á afección granate achegarse a animar, o feito de ter duelos como visitantes preto da casa é reconfortante. "Preferimos non ter que desprazarnos e facer viaxes longas. Moito mellor, e canto máis se parezan os partidos aos da casa, por rutinas, por horarios, é moito mellor".

O club granate puxo en marcha unha nova promoción para facilitar que as bancadas de Pasarón teñan o mellor aspecto posible nos partidos que faltan para rematar a liga. Estar na casa sempre é máis agradecido cando se presenta toda a familia.

"Igual que na temporada pasada pediamos que a xente viñese ao campo porque estabamos nunha situación delicada, desta estamos nun momento para soñar todos e ilusionarnos. Pedímoslles que veñan para axudarnos a pelexar por disputar un play-off de ascenso de categoría".

O técnico do cadro de Pasarón é consciente da relevancia que ten un ascenso "a tódolos niveis, pode cambiarnos a vida. Para a cidade, para o club, para o corpo técnico, para os futbolistas, para a prensa... para todos".

E aínda que sabe que non é sinxelo, e menos despois dos últimos resultados, tamén sabe que non é imposible. "Témolo aí. É difícil, pero hai puntos para facelo e se gañamos o luns todo se verá doutra maneira diferente. Está nas nosas mans".

Para iso, o Pontevedra deberá bater a un rival moi duro. "O Guijuelo tamén está aí. A mesma ilusión que temos nós vana ter eles. Haberá momentos nos que o pasemos mal e o rival aperte. E verte empurrado pola túa xente neses intres nótase. Coa súa axuda vai ser todo máis doado. Que a xente se anime, que confíe no equipo, que nós imos dalo todo", concluíu o técnico do Pontevedra.