Víctor Vázquez e David Soto foron os dous futbolistas máis empregados por Ángel Rodríguez na liga 2021-22 que vén de rematar. A parella de centrais encabeza a lista dos claros titulares do preparador leonés, que confiou plenamente nun grupo de homes por diante dos demais para conseguir o obxectivo marcado polo club ao comezo do curso.
Esa política de insistir nun equipo moi definido manifestouse de maneira evidente nos datos, coas grandes diferenzas de minutaxe entre os once presuntos titulares e case tódolos demais compoñentes do grupo.
Esa diferenza acrecéntase a medida que se profundiza no banco. O preparador da escadra granate recorreu a 23 xogadores durante a campaña, pero só 16 superaron os 500 minutos.
Víctor Vázquez foi o primeiro da lista. Completou 2.915 minutos nos 33 partidos que levou a cabo, todos como titular. Só deixou de vestirse de curto nunha cita, por sanción.
Detrás del, canto a minutos xogadores, atópase a súa parella de baile, David Soto, que non estivo en dous enfrontamentos, pero non lle andou lonxe ao marinense canto a minutos sobre o céspede (2.851).
O propio Víctor Vázquez, Álex González e Alberto Rubio foron os que participaron en máis partidos, 33
O seguinte foi o capitán Álex González. O de Vernejo, na faceta de extremo ou na de lateral esquerdo, perdeuse un partido en todo o curso a causa da sanción polo cartón vermello contra o Leganés B. Xogou 33 duelos, 32 deles como titular. Suplente ante ao Arenteiro, ausente contra o Bergantiños.
Ademais del e de ‘Churre’, un terceiro futbolista estivo en 33 encontros: Alberto Rubio. O interior dereito foi tamén o home máis substituido da escadra. Titular en 29 envites, só rematou tres deles. Nos outros 26 ou foi substituido ou expulsado (unha vez).
Atendendo ás cifras, o equipo tipo de Ángel Rodríguez foi moi claro, cos once homes por enriba de 25 titularidades: Pablo Cacharrón, Seoane, David Soto, Víctor Vázquez, Samu Araújo, Miguel Román, Yelko Pino, Alberto Rubio, Brais Abelenda, Álex González e Charles.
Dos teóricos suplentes só houbo un, Rufo, que se achegase ás cantidades de tempo acumulada polos once de saída. Ademais del, Javi Rey superou os 1.000 minutos.
Romay, Oier Calvillo e Martín Diz foron os trocos recorrentes para o preparador da escadra granate. A eles, hai que agregar o comezo na titularidade de Álvaro Cortés na porta.
Tódolos demais membros do colectivo tiveron un rol bastante secundario e unha escasa participación. Entre eles, inclúense case que tódolos canteiráns, excepto o mencionado Diz. Santi Figueroa, dada a baixa de Seoane por lesión, tivo a posibilidade de ter minutos, aínda que en poucos partidos.
Houbo dous debutantes co primeiro plantel en duelo oficial neste curso: Valentín Jaichenko e Pablo López.
