PONTEVEDRA. A adestradora do Club Baloncesto Arxil, Maite Méndez, e o xornalista Xaime Nogueira protagonizan hoxe (20.00 horas, entrada libre), na Casa das Campás, a última charla da cuarta edición do ciclo Conversas na Uvi, unha actividade organizada conxuntamente entre Diario de Pontevedra e a Universidade de Vigo.
Nogueira, xornalista de Deportes do Diario, falará coa adestradora da temporada que realizou o seu equipo, da súa traxectoria profesional, de cuestións relacionadas do deporte feminino e do Campeonato de España Infantil Femenino de Baloncesto que se vén de celebrar na cidade.
Nesta temporada, a decimo sétima do CB Arxil na Liga Femenina Dos, Maite Méndez (xunto á súa axudante, Milagros Sanmartín) cumpriu 450 partidos á fronte do equipo pontevedrés. Con el disputou tres play-off de ascenso á Liga Femenina, o último na temporada 2014-15.