Gadisa Retail realizou compras por valor de 390 millóns de euros a 1.022 produtores locais ao longo do ano 2021, segundo informa a compañía galega nun comunicado este luns.
Deste xeito, sinala que a empresa "contribúe a fortalecer o tecido produtivo das comunidades nas que está presente, xerar emprego de calidade e promover unha alimentación saudable entre os seus clientes potenciando as seccións de produto fresco en todos os seus puntos de venda".
Remarca que incorpora os seus produtos aos máis de 450 puntos de venda das diferentes liñas de negocio da compañía, á vez que aposta pola capacidade de innovación en sectores produtivos claves para a economía de Galicia: pesqueiro, lácteo, agrícola e gandeiro.
Paralelamente, Gadisa Retail realiza dous novos proxectos. Por unha banda, a construción dunha nave no porto da Coruña para a compra e xestión de peixes e mariscos, co obxectivo de potenciar as seccións de pescadería. O investimento supera os 4,9 millóns de euros.
Por outra banda, a ampliación da plataforma na súa sede central de Betanzos. Desde este centro loxístico do polígono de Piadela xestiónanse produtos de alimentación, tanto a temperatura ambiente como refrigerada. Contará cunha superficie de 24.400 m2 repartida en dúas plantas.
Gadisa retail dispón, ademais, dunha plataforma loxística en Medina del Campo, que dá servizo aos supermercados de Castela e León.
