Tres días despois do afundimento do buque mercantil 'Don Pedro' nas costas da illa de Eivisa, o verquido de fuel e carburante do barco obrigou a pechar ao público tres praias da illa: Talamanca, Ses Figueretes e D´embossa. Ata o de agora, o buque especializado contra a contaminación 'Clara Campoamor', que traballa na zona dende o pasado mércores, recolleu 25 toneladas de fuel.
Este mediodía selouse a cuarta rotura localizada no barco, situada nunha das tubaxes e pola que saía o combustible do mercante afundido. A estas horas comezaron a instalarse tamén os 3.500 metros de barreiras anticontaminación procedentes de A Coruña, Santander e Zaragoza. Tentarase así que a vertedura non avance e siga a contaminar o litoral e, ao mesmo tempo, que axude á limpeza da costa.
O verquido de fuel e carburante do 'Don Pedro', xa contaminou máis de 600 metros do litoral ibizenco. Segundo a ministra de Fomento, Magdalena Álvarez, non existe "risco de rotura" dos tanques de carburante do barco sinistrado e polo de agora os mergulladores non atoparon máis fugas. Está previsto que ó longo do día de hoxe cheguen a cincuenta os operarios que recollen o contaminante dende a praia, fronte á vintena que traballan agora.
A navieira canaria Iscomar, propietaria do buque, e o seu armador, "xa se fixeron responsables do sucedido", segundo a ministra de Fomento. A empresa propietaria, expedientada xa polo verquido, deberá encargarse da extracción do fuel dos tanques.
Polo de agora seguen activados o Plan Nacional de Emerxencias contra a contaminación e o 'Plan Territorial' do goberno balear.
'Don Pedro'
O buque mercante 'Don Pedro', propiedade da navieira canaria Iscomar, chocou "por un erro humano" aos poucos minutos de saír do porto contra o illote Dado Grande (Eivissa). Os seus tripulantes foron postos a salvo, pero o barco permanece fundido a 45 metros de profundidade, segundo informaron as autoridades ibizencas.
Dende o primeiro momento, o barco anticontaminación Clara Campoamor, o máis moderno de Europa no seu eido, comezou coas labores de salvamento e rescate.
