O renovado Pórtico da Gloria poderá visitarse de forma gratuíta até sete horas e media á semana, en grupos organizados que permitirán o acceso a un total de 550 persoas, aínda que o tempo de estancia dos visitantes limitarase a 15 minutos nestes casos e non a 45 como se establece nas entradas de pago.
A Catedral de Santiago, a través dun comunicado, informou da regulación das visitas gratuítas ao conxunto escultórico de Mestre Mateo. Poderase ver, sen cargo, unha hora de luns a sábado, de 19.00 a 20.00 horas, e en hora e media, de 18.30 a 20.00 horas, o domingo.
Fronte ás catro horas de visita obrigatoria gratuíta establecidas pola Lei de Patrimonio Cultural ao tratarse dun Ben de Interese Cultural, a Catedral destaca que serán sete horas e media –30 mensuais– as que se poderá acceder gratis, sen ter que pagar os 10 euros, en entrada xeral, que se comezarán a cobrar cando o Pórtico volva abrirse ao público.
No caso do estudantado, peregrinos, persoas desempregadas e maiores de 65 anos a entrada será de 8 euros, custe reducido, 2 para os escolares e gratuíta para os amigos da Catedral. A visita combinada ao Pórtico, á colección permanente do Museo Catedral e a Compostela Sacra ascenderá a 12 euros, reducida a 10 e para escolares a 3.
O malestar xerado polo anuncio do cobro para unha obra cuxa rehabilitación tivo un custo de 6,2 millóns de euros –financiados pola Fundación Barrié–, levou a que no Parlamento galego, o pasado setembro, os grupos políticos, por unanimidade, tras unha proposta do PsdeG, instaran á Xunta a que acordase coa Igrexa a visita libre e gratuíta ao Pórtico polo menos catro días ao mes.
A Catedral volveu xustificar o cobro de entrada no obxectivo de "aproximarse ao auto sostemento, con recursos propios, do esixente mantemento que demanda o Pórtico".
