jueves. 22.10.2020 |
El tiempo
jueves. 22.10.2020
El tiempo

O 88% dos alumnos aproban a selectividade en Galicia

Alumnos nun dos exames da selectividade en Pontevedra. JOSÉ LUIZ OUBIÑA
Alumnos nun dos exames da selectividade en Pontevedra. JOSÉ LUIZ OUBIÑA
A porcentaxe de aprobados está un pouco por baixo da de anos anteriores

ABAU 2020 | Consulta aquí las notas de selectividad

O 87,96 por cento dos alumnos que se presentaron á selectividade este ano en Galicia aprobaron a proba, segundo informou a Comisión Interuniversitaria de Galicia (CIUG) este xoves. En concreto, o organismo explicou que 12.497 alumnos realizaron os exames da parte obrigatoria da Avaliación do Bacharelado para o Acceso á Universidade (Abau) nesta convocatoria e que 10.992 resultaron aptos. 

A porcentaxe de aprobados está un pouco por baixo da de anos anteriores (o ano pasado foi do 91,46 por cento), algo que representantes da CIUG atribuíron a que se presentaron un maior número de estudantes porque tamén aprobaron o bacharelato máis persoas que outros anos. 

Os resultados dos exames déronse a coñecer este xoves con algo máis dunha hora de atraso (estaba previsto que se publicasen ás 20.00 horas) debido de que a aplicación Nerta da Consellería de Educación, a través da que o alumnado debía acceder para coñecer as súas notas, "colapsou", explicou a CIUG. 

O día 20 ábrese o prazo para a preinscrición nas carreiras que os alumnos desexan estudar

Este ano, agregou a comisión, houbo case 1.000 correctores que se ocuparon de revisar case 100.000 exames. A cantidade de persoas que trataban de acceder ao mesmo tempo á aplicación provocou o colapso do sistema, indicou. 

Até o día 21 ás 14,00 horas, os alumnos poden solicitar a revisión dos seus exames. Estas peticións resolveranse antes do día 23, cando se publicará a listaxe definitiva de notas. Ademais, o día 20 ábrese o prazo para a preinscrición nas carreiras que os alumnos desexan estudar, que deben rexistrar por orde de preferencia na súa solicitude até o día 28. 

En total, para esta selectividade marcada polo coronavirus e as medidas de seguridade e hixiene para evitar contaxios, estaban rexistradas 14.559 persoas, das que se presentaron finalmente 14.379, o 98,76 por cento. 

As cifras supuxeron un récord de matriculados, posto que para esta convocatoria había ao redor dun 26 por cento máis de alumnos rexistrados para a selectividade que hai un ano. 

As probas, que se adoitan realizar en xuño, pospuxéronse por mor da crise sanitaria derivada da Covid-19 e Galicia celebrounas o 7, 8 e 9 de xullo. Nos recintos que acolleron os exames aplicáronse medidas para evitar aglomeracións e para garantir a distancia interpersoal. 

O 88% dos alumnos aproban a selectividade en Galicia
Comentarios