Ana Pontón propón unha mesa para modernizar o sector da automoción

Europa Press
Ana Pontón. EFE
photo_camera Ana Pontón. EFE

A portavoz nacional e candidata do BNG á presidencia da Xunta de Galicia, Ana Pontón, propuxo este martes unha serie de medidas para "modernizar" o sector da automoción, para que gañe competitividade e que se freen a deslocalización e a precariedade no emprego. 

Así o trasladou após manter un encontro con representantes sindicais da CIG neste ámbito industrial, coa "convicción" de que Galicia necesita "un sector industrial forte" para "ter futuro". 

A candidata nacionalista defendeu que o BNG contempla a automoción, no seu programa de goberno, como unha industria "chave" para o desenvolvemento económico de Galicia e, por iso, propón medidas para que se "adapte" aos novos tempos. 

Entre esas medidas, Ana Pontón expuxo a constitución dunha "mesa" do sector, con representación da administración, das empresas e dos traballadores, "que permita deseñar o futuro" desta industria. A ese respecto, incidiu en que a automoción se atopa nun momento de cambios "acelerados", como a transición cara á desaparición dos motores diésel, e que debe "prepararse" e "adaptarse" a ese escenario. 

Outra das medidas expostas é a histórica demanda do BNG de implantar unha "tarifa eléctrica galega" que, sinalou a candidata, permitirálle á industria en xeral e á automoción en particular abaratar os seus custos enerxéticos e ser máis competitiva. 

Ana Pontón avogou tamén por medidas que freen a "deslocalización" e anunciou unha lei a ese respecto que, ademais de evitar a fuga, "garanta" a instalación de empresas en Galicia. 

Finalmente, a aspirante do BNG á presidencia da Xunta lamentou que, nos últimos anos, "a precariedade é cada vez maior" na industria galega de automoción, e apostou por unha industria con "traballadores ben pagos", porque Galicia conta con "xente capaz e ben formada", cuxo futuro "non se pode escribir coa 'P' de precariedade". 

Pola súa banda, a responsable de automoción da CIG, María Xosé García, criticou a "pésima" actitude da Xunta con respecto a este sector e á industria en xeral, dedicándose a "subvencionar multinacionais", "sen preocuparse" da saúde e as condicións laborais dos traballadores. "O sector de automoción estásenos indo das mans, como xa pasou co naval", advertiu, e lembrou que a precariedade no emprego ten fatais consecuencias, como os accidentes que poden acabar en morte, en alusión ao ocorrido nunha planta de compoñentes de automoción no Porriño (Pontevedra) hai unhas semanas. 

Comentarios