Os líderes do BNG e do PSdeG de Pontevedra, Miguel Anxo Fernández Lores e Teresa Casal, asinaron hoxe o pacto de gobernabilidade que definirá o mandato conxunto das dúas forzas durante os próximos catro anos. Ademais, deuse a coñecer o reparto final das concellerías, marcada pola igualdade nas particións, e pola división das responsabilidades de Urbanismo.
Esta disputada concellería queda dividida en dúas partes. Por un lado o PSdeG farase cargo da xestión urbanística, que inclúe planeamento, execución xurídica e concesión de licencias, e supervisará todo o relacionado coas obras públicas tanto no rural como no Casco Histórico.
O BNG será o encargado de xestionar a ordenación do territorio, os grandes proxectos de infraestruturas e a tramitación do Plan Xeral de Ordenación Municipal e as obras de reforma que se realicen no casco urbano urbano da cidade, a excepción do casco histórico.
En canto ó resto das responsabilidades, os nacionalistas quedan con Economía e Facenda, Protección Cidadá, Cultura e Festas e Consumo, que xa detentaban na pasada lexislatura, e incorpóranse ademais á xestión de Parques e Xardíns, Mobilidade e Transporte, Deportes, Universidade e Xuventude.
O PSOE, pola súa parte, repite nas áreas de Benestar Social, Promoción Económica, Turismo e Educación, e asume ademais as competencias de Réxime Interior, Persoal, Vivenda e Medio Ambiente.
